Ýakynda Türkmenistanyň Magtymguly adyndaky Ýaşlar guramasynyň Ahal welaýatynyň Tejen etrap Geňeşiniň, etrabyň beýleki jemgyýetçilik guramalarynyň hem-de «Altyn asyr» teleýaýlymynyň bilelikde guramagynda etrapdaky Dikeldiş merkeziniň kitaphanasynda «tegelek stoluň» başynda söhbetdeşlik geçirildi.
«Pähim paýhas ummany Magtymguly Pyragy» ýylyna hem-de şanly Garaşsyzlygymyzyň 33 ýyllygyna bagyşlanan söhbetdeşlikde TMÝG-nyň Tejen etrap Geňeşiniň sanly ulgam boýunça esasy hünärmeni Aýnagözel Annamyradowa, Türkmenistanyň Kärdeşler arkalaşyklarynyň etrap birleşmesiniň esasy hünärmenleri Aýsoltan Öwezowa hem-de Bägül Gurbanowa Türkmenistanyň Demokratik partiasynyň etrap komitetiniň esasy hünärmeni Selbi Baýramowa dagy çykyş etdiler. Olar çykyşlarynda hormatly Prezidentimiziň öňdengörüjilikli baştutanlygynda Garaşsyzlygymyzyň şanly 33 ýyllyk baýramçylygyna görülýän taýýarlyklar, Garaşsyzlyk ýyllary içinde ýurdumyzda gazanan üstünlikler, Watanymyzyň bu günki ösüşleri, döwlet we milli maksatnamalaryň üstünlikli amala aşyrylyşy, dürli ugurlarda gazanylýan üstünlikler, ýetilýän sepgitler barada täsirli söhbet etdiler.
Söhbetdeşlige gatnaşanlar Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagyny, döwletli tutumlarynyň rowaçlanmagyny arzuw etdiler.
Ogulsenem ÇALOWA,
TMÝG-nyň Ahal welaýatynyň Tejen etrap
Geňeşiniň esasy hünärmeni.
