Hormatly Prezidentimiziň «Mertler Watany beýgeldýär» atly kitaby ýaşlary watansöýüjilik ruhunda, ýokary milli ruhy-ahlak ýörelgeler esasynda terbiýelemekde uly ähmiýete eýedir.
Kitapda milli Liderimiziň Türkmenistanyň goranyş häsiýetli Harby doktrinasyny durmuşa geçirmegiň barşynda ýurdumyzda amala aşyrylan işler, bu doktrinanyň dolulygyna ýerine ýetirilişi, ata-babalarymyzyň watanperwer häsiýetleriniň biziň döwrümizde ösdürilişi hakyndaky pikirler, watançylyk duýgulary bilen gurşap alýar.
Kitaby okanyňda ýurdumyzyň harby güýçlerinde gulluk edýän ýaşlara we halypalara goýulýan hormatyň çäksizdigine, olaryň iş we gulluk şertleriniň gowulanmagy, harby ulgamyň döwrebap tehnikalar we elektron ulgam bilen üpjün edilmegi ugrunda işleriň yzygiderlilikde dowam edýänligine göz ýetirmek bolýar.
Ýurdumyzda harby ulgamda gulluk edýän ýörite hünärmenlere bilim bermek, olaryň harby taýýarlygynyň ýokary derejede bolmagy, döwrebap bilimlerden baş çykarýan, dürli dilleri bilýän, ýüreklerinde Watan söýgüsi möwç urýan ýaşlar bolmagy ugrunda ummasyz işler durmuşa geçirildi. Watan goragynyň ygtybarly ellerde bolmagy üçin döwletimiz tarapyndan edilýän bu aladanyň jogaby ýaş hem gujurly esgerlerimiziň hüşgärliginde, halypa harby hünärmenleriň parasatlylygynda has-da aýdyň ýüze çykýar. Her ýyl Garaşsyzlygymyzyň şanly toýunda geçirilýän harby ýörişde türkmen ýigitleriniň ýokary ussatlyklary görkezmekleri, kalbymyzda eziz Watanymyza we Arkadag Prezidentimize bolan buýsanjy has-da belent derejä ýetirýär.
Hormatly Prezidentimiziň «Mertler Watany beýgeldýär» atly kitabynyň tanyşdyrylyş dabaralarynda çykyş edýän kalby joşgunly ýaşlar, ýurdumyzda durmuşa geçirilýän her bir tutumly işleriň Watanymyzyň abraýyny beýgeldýän maksatdan ugur alýandygy, ýaşlaryň ählitaraplaýyn kämil bolup ýetişmekleri barada giň mümkinçilikleriň döredilýändigi barada buýsanç bilen aýdýarlar.
Watany söýmek, onuň her bir daban topragyny mukaddeslik hökmünde goramak, Watanymyzyň ykbalyna öz üstünliklerimiz bilen dahylly bolmak, biziň mukaddes borjumyzdyr. Hormatly Prezidentimiz «Mertler Watany beýgeldýär» atly kitabynda: «Iň gowy asylly ýörelgeler Watanyň beýgelmeginiň hatyrasyna amal edilýändir. Watanyň goragy bolsa mukaddesligiň goragydyr» diýip belleýär. Gahryman Arkadagymyzyň bu ajaýyp sözleri Watan mukaddesligini, Watan keramatyny we onuň ezizligini has-da belende göterýär.
Bu kitapda Watanymyzyň ezizligi hakyndaky gymmatly duýgular giňden beýan edilýär. Kitapda watansöýüjilik, agzybirlik, parahatçylyk, dost-doganlyk, adalatlylyk, halallyk, birek-birege hormat goýmak, her bir işde jogapkärçiligi duýmak ýaly ajaýyp duýgular kalbyňy gurşap alýar. Kitapda Garaşsyz, hemişelik Bitarap Türkmenistanyň Harby doktrinasyna laýyklykda, ýurdumyzyň asudalygynyň üpjün edilmeginiň döwletimiziň alyp barýan syýasatynyň möhüm ugrudygy beýan edilýär. Milli Liderimiziň täze kitabynyň birnäçe bölümleri gaýduwsyz atly esgerlere bagyşlanýar. Kitapda Arkadag Prezidentimiziň behişdi bedewlere bolan tolgundyryjy we belent sarpasyny äşgär edýän adalgalar öz beýanyny tapýar.
Halkymyza şeýle ajaýyp kitaplary sowgat berýän Arkadag Prezidentimize çäksiz alkyş aýdýarys.
Arslan GYŞYKOW,
TMÝG-niň Ahal welaýat geňeşiniň başlygy.
“Nesil” gazeti,
02.03.2017ý.
