Ýurdumyzyň orta mekdepleriniň 3-5-nji synp okuwçy oglanlarynyň arasynda yglan edilen «Merdana nesil — 2024» atly şadyýan bäsleşigiň Ahal welaýatynyň Kaka etrap tapgyry örän gyzykly geçdi. Türkmenistanyň Magtymguly adyndaky Ýaşlar guramasynyň Kaka etrap Geňeşi bilen etrap bilim bölüminiň bilelikde guramagynda geçen bu bäsleşige etrabyň dürli ýerlerinden mekdebara saýlama gözden geçirişlerinde öňe saýlanan okuwçy oglanlar gatnaşdylar.
Ýaş nesliň özboluşly baýramçylygyna öwrülen bäsleşige okuwçy oglanlaryň örän taýýarlykly gelendigine göz ýetirmek diýseň ýakymly boldy. Olar şertleriň ählisini talabalaýyk ýerine ýetirmek bilen, zehin-başarnygyny doly derejede görkezdiler. Zehinli, aýdym-saz sungatyna höwesli, ruhubelent, giň dünýägaraýyşly çagalary ýüze çykarmak maksadyndan ugur alan bäsleşigiň dowamynda emin agzalary tarapyndan ýeňijiler kesgitlendi.
Bäsleşigiň etrap tapgyrynda I orna 10-njy orta mekdebiň okuwçysy Agamyrat Rejepmyradow, II orna 21-nji orta mekdebiň okuwçysy Selim Öwezow, III orna 5-nji orta mekdebiň okuwçysy Atageldi Tejengeldiýew mynasyp boldy. Bäsleşigiň ýeňijilerine Türkmenistanyň Magtymguly adyndaky Ýaşlar guramasynyň Kaka etrap Geňeşiniň hormat hatlary hem-de ýadygärlik sowgatlary gowşuryldy.
Begli MÄMMEDOW,
TMÝG-niň Ahal welaýatynyň Kaka etrap
Geňeşiniň Guramaçylyk bölüminiň müdiri.
