Golaýda Türkmenistanyň Magtymguly adyndaky Ýaşlar guramasynyň Daşoguz welaýat Geňeşi Daşoguz welaýat Baş bilim müdirligi bilen bilelikde, Daşoguz şäheriniň Bagtyýar zaman medeniýet öýünde «Merdana nesil – 2024» atly şadyýan bäsleşigiň welaýat tapgyryny geçirdi. Türkmenistanyň Magtymguly adyndaky Ýaşlar guramasynyň Merkezi Geňeşiniň Bilim ministrligi bilen bilelikde, Halkara Bitaraplyk güni hem-de Birleşen Milletler Guramasynyň Baş Assambleýasy tarapyndan Türkmenistanyň Hemişelik Bitaraplyk derejesiniň ykrar edilmeginiň 29 ýyllygy mynasybetli, ýurdumyzyň umumybilim berýän orta mekdepleriniň 3 – 5-nji synplarynda okaýan okuwçy oglanlaryň arasynda yglan eden «Merdana nesil» atly şadyýan bäsleşigiň welaýat tapgyryna bäsleşigiň 2-nji – şäher, etrap tapgyrlarynda ýeňiji bolan okuwçy oglanlar gatnaşdylar. Oňa gatnaşan oglanlar onuň şertlerine görä, türkmen halkyna mahsus bolan merdanalygy, Watana bolan söýgüni, ata-babalarymyzyň gahrymançylykly synmaz ruhuna belent sarpasyny, bagtyýar zamanamyzda ýetilen üstünlikleri, ýürek buýsançlaryny çeper sözleriň üsti bilen beýan etmek, ýekelikde şorta sözleri ýerine ýetirmek, Arkadagly Gahryman Serdarymyzyň parasatly ýolbaşçylygynda Berkarar döwletiň täze eýýamynyň Galkynyşy döwründe amala aşyrylýan uly ösüşleri, bagtyýar çagalygy, dost-doganlygy wasp edýän aýdym-sazly çykyşlary ýerine ýetirmek boýunça öz ukyp-başarnyklaryny görkezdiler. Bäsleşik bäsleşijileriň, olaryň janköýerleriniň hem-de tomaşaçylarynyň durmuşynda ýatdan çykmajak pursatlara baý boldy.
Netije-de, 1-nji orna Daşoguz şäheriniň 3-nji orta mekdebiniň 3-nji synp okuwçysy Söýün Nazarmedow, 2-nji orna Daşoguz şäheriniň 13-nji orta mekdebiniň 4-nji synp okuwçysy Joşgun Pirnepesow dagylar mynasyp bolup, olar bäsleşigiň ýeňijileri diýlip yglan edildiler hem-de onuň jemleýji – döwlet tapgyryna gatnaşmaga hukuk gazandylar. Şadyýan bäsleşigiň ýeňijilerine we oňa işjeň gatnaşan okuwçylara Ýaşlar guramasynyň ýerli Geňeşiniň Hormat hatlary we ýadygärlik sowgatlary gowşuryldy.
Ýakup ATABAÝEW,
TMÝG-niň Daşoguz welaýat Geňeşiniň başlygynyň orunbasary,
Türkmenistanyň Mejlisiniň deputaty.
