Berkarar döwletiň täze eýýamynyň Galkynyşy döwründe Gahryman Arkadagymyzyň we Arkadagly Gahryman Serdarymyzyň ýolbaşçylygynda berkarar döwletimizde watandaşlarymyzyň her bir güni uly şatlyk-şowhuna, ýatdan çykmajak taryhy pursatlara beslenýär. Şu günler bolsa beýik özgertmeler bilen ösüşiň täze belentliklerine tarap ynamly gadam urýan agzybir halkymyz Täze ýyl baýramçylygyny uly ruhubelentlik bilen belleýär. Täze ýyl baýramy mynasybetli daş-töweregimiziň gözelligi, geçirilýän dürli baýramçylyk dabaralary bagtyýar ildeşlerimiziň göwün guşuna ganat baglap, geljek ýylyň hem üstünlikli ýyllaryň biri boljakdygyna ynamyňy artdyrýar. Biz hem Türkmenistanyň Magtymguly adyndaky Ýaşlar guramasynyň agzybir işgärleri bolup dana şahyrymyz Magtymguly Pyragynyň doglan gününiň 300 ýyllygyna bagyşlanan «Pähim-paýhas ummany Magtymguly Pyragy» ýylynyň uly üstünlikler, ýatdan çykmajak taryhy pursatlar, beýik ýeňişler bilen jemlenmegi mynasybetli baýramçylyk dabarasyny geçirdik. Çärjew etrap häkimliginiň we etrabyň jemgyýetçilik guramalarynyň bilelikde guramagynda Lebap welaýatynyň «Aý-Gün» toý mekanynda geçirilen Täze ýyl dabarasynda medeniýet we sungat işgärleriniň taýýarlan aýdym-sazly çykyşlaryna giň orun berildi.
Baýramçylyk dabarasyna etrabymyzyň öňdebaryjy zähmetkeşleri, ýylyň dowamynda dürli bäsleşiklere gatnaşyp, işjeňlik görkezen ýaşlar gatnaşdylar. Dabarada şanly ýylymyzda ýurdumyzyň syýasy-jemgyýetçilik durmuşyny bezän buýsançly wakalar, açylyp ulanylmaga berlen durmuş ähmiýetli binalar, halkymyzyň ýaşaýyş-durmuş derejesini gowulandyrmaga gönükdirilen beýik işler dogrusynda bagtyýar ildeşlerimiziň baýramçylyk gutlaglary diňlenildi. Şeýle hem belentden ýaňlanan aýdym-sazly çykyşlarda, joşgunly tanslarda nurana günlerimiziň waspy öz beýanyny tapdy.
Pursatdan peýdalanyp Gahryman Arkadagymyzy we Arkadagly Gahryman Serdarymyzy, ähli türkmen halkyny Täze ýyl baýramy bilen tüýs ýürekden gutlaýaryn. Bize şeýle mümkinçilikleri döredip beren türkmen halkynyň Milli Lideri Gahryman Arkadagymyzyň we Arkadagly Gahryman Serdarymyzyň janlary sag, ömürleri uzak bolsun, tutýan il-ýurt bähbitli umumadamzat ähmiýetli işleri elmydama rowaçlyklara beslensin! Täze ýylyňyz gutly bolsun!
Azat MAMEDOW,
TMÝG-nyň Lebap welaýatynyň
Çärjew etrap Geňeşiniň başlygy.
