Tebigat – biziň öýümizdir. Ol bize howa, suw, iýmit we ýaşaýyş üçin zerur ähli mümkinçilikleri berýär. Emma adamzat ösüşi bilen bilelikde, daşky gurşaw dürli howplara sezewar bolýar. Tebigaty goramak diňe bir borç bolman, eýsem, geljek nesiller üçin jogapkärçiligiň hem bir bölegidir.
Tebigat – bu diňe bir tokaýlar, daglar we derýalar däl. Ol – ýaşaýşyň esasy çeşmesidir. Adamzat ösümliklerden we haýwanlardan başlap, ýer astyndaky tebigy baýlyklara çenli ähli zatdan peýdalanýar. Tebigy deňagramlylyk bozulan halatynda bolsa, ekologiýa kynçylyklary ýüze çykýar.
Daşky gurşawa howp salýan çeşmeler:
1. Zyňyndylar we hapaçylyk – plastmassa, zäherli galyndylar we himiki serişdeler tebigatyň hapalanmagyna sebäp bolýar.
2. Tokaýlaryň ýitirilmegi – agaç kesmek howanyň hapalanmagyna we ýaşaýyş gurşawynyň ýitmegine getirýär.
3. Howanyň üýtgemegi – zawodlaryň we ulaglaryň zyňyndylary howanyň gyzmagyna sebäp bolup, bu ýagdaý tebigy hadysalara täsir edýär.
4. Suw çeşmeleriniň hapalanmagy – derýalara we deňizlere hapa suwlary akytmak içimlik suw ýetmezçiligine sebäp bolýar.
Her bir adam tebigaty goramak üçin azajyk hem bolsa, goşant goşup biler:
Gaýtadan işlenilýän materiallary ulanmak, plastmassadan gaça durmak;
Agaç ekmek we tokaýlary goramak;
Suwy we energiýany tygşytly ulanmak;
Zyňyndylary dogry tertiplemek we bölmek.
Häzirki wagtda ýurdumyzyň ekologiýa syýasaty ekologiýa howpsuzlygyny üpjün etmäge, daşky gurşawyň goralmagyny, ilatymyzyň ýaşaýşy üçin arassa, sagdyn we amatly daşky gurşawy üpjün etmäge gönükdirilendir.
Tebigaty goramak diňe bir alymlaryň ýa-da hökümetleriň işi däldir. Her bir adam daşky gurşaw üçin jogapkärdir. Eger biz şu gün tebigatyň gadryny bilsek, onda geljekde hem arassa howa, dury suw we ýaşyl tebigat bilen ýaşarys. Geliň, tebigatyň goragçysy bolalyň!
Ýazjemal BAZAROWA,
Türkmenistanyň Magtymguly adyndaky
Ýaşlar guramasynyň Daşoguz welaýatynyň
Daşoguz şäher Geňeşiniň esasy hünärmeni.
