Berkarar döwletiň täze eýýamynyň Galkynyşy döwründe Garaşsyz, baky Bitarap Watanymyz milli bähbitlere, ählumumy abadançylygyň maksatlaryna laýyk gelýän parahatçylyk, hoşniýetli goňşuçylyk we giň halkara hyzmatdaşlyk syýasatyny gyşarnyksyz ýöredýär hem-de döredijilikli ösdürýär. Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Gurbanguly Berdimuhamedowyň 19-20-nji ýanwarda Monako Knýazlygyna bolan saparynyň barşynda bu hakykat has-da dabaralandy.
Gahryman Arkadagymyzyň Monako Knýazlygyna bolan sapary habar beriş serişdelerinde giňden beýan edildi. Milli Liderimiziň Monako Knýazlygynyň Şazadasy Alber II bilen geçiren netijeli duşuşyklary iki dostlukly halkyň bähbitlerine laýyk gelýän özara gatnaşyklaryň hil taýdan täze derejä çykýandygyny görkezdi. Gahryman Arkadagymyzyň bu saparynyň Türkmenistan bilen Monakonyň arasyndaky diplomatik gatnaşyklarynyň ýola goýulmagynyň 10-njy ýylyna gabat gelmegi onuň taryhy ähmiýetini artdyrýar.
Hormatly Prezidentimiz: «Dünýä döwletleri bilen deňhukukly we özara bähbitli gatnaşyklary ösdürmek döwletimiziň daşary syýasatynyň esasy ugurlarynyň biridir» diýip belleýär. Türkmen halkynyň Milli Lideri, Gahryman Arkadagymyzyň Monako Knýazlygyna bolan sapary bolsa mizemez dostana gatnaşyklaryň rowaçlanmasyna öwrüldi hem-de kalbymyzda ýakymly duýgulary döretdi. Şonuň bilen baglylykda, Türkmenistanyň Magtymguly adyndaky Ýaşlar guramasynyň Sarahs etrap Geňeşiniň wekilleri bolup, şu günler etrabymyzyň ýaşlarynyň arasynda geçirýän wagyz-nesihat işlerimiziň barşynda Gahryman Arkadagymyzyň Monako Knýazlygyna bolan saparynyň taryhy ähmiýetini hem wagyz edýäris.
Goý, ösüş-özgertmelere beslenen taryhy döwürde berkarar Watanymyzyň dünýä döwletleri bilen barha işjeňleşýän, okgunly häsiýete eýe bolýan dost-doganlyk gatnaşyklary we özara bähbitli hyzmatdaşlygy has-da rowaçlansyn!
Zubeýda GURTÝAZOWA,
Türkmenistanyň Magtymguly adyndaky
Ýaşlar guramasynyň Sarahs etrap
Geňeşiniň esasy hünärmeni.
