Şu gün paýtagtymyzdaky Jemgyýetçilik guramalarynyň merkezi binasynda Türkmenistanyň Magtymguly adyndaky Ýaşlar guramasynyň Aşgabat şäher Geňeşiniň we «Aşgabat» teleýaýlymynyň bilelikde guramagynda «Galkynyş» milli at üstündäki oýunlar toparynyň Monako Knýazlygynyň Monte-Karlo şäherinde geçirilen halkara sirk sungaty festiwalynda Baş baýraga eýe bolmagy mynasybetli «Bedewli diýarym, toýly mekanym, gün-günden beýgelýär şöhratyň-şanyň!» atly brifing duşuşygy geçirildi. Çärä ýurdumyzyň umumybilim berýän orta mekdepleriniň okuwçylary, ýokary we orta hünär okuw mekdepleriniň talyp ýaşlary hem-de pudaklaýyn dolandyryş edara- kärhanalaryň hünärmenleri gatnaşdylar.
Brifingiň dowamynda çykyş edenler «Galkynyş» milli at üstündäki oýunlar toparynyň halkara derejesinde geçirilýän birnäçe abraýly festiwallarda yzygiderli çykyş edip, üstünlik gazanýandyklary, şunuň bilen, Milli Liderimiziň başlangyjy bilen täzeden dikeldilen türkmen sirk sungatynyň dünýä derejesinde abraýynyň barha ýokarlanýandygy dogrusynda buýsançly gürrüňler edildi.
Duşuşygyň ahyrynda oňa gatnaşanlar milli medeniýetimiziň ösmegi ugrunda taýsyz tagallalary edýän Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak bolmagyny, il-ýurt bähbitli umumadamzat ähmiýetli beýik işleriniň elmydama rowaçlyklara beslenmegini tüýs ýürekden arzuw etdiler.
Ogulbäbek BAÝMYRADOWA,
Türkmenistanyň Magtymguly adyndaky
Ýaşlar guramasynyň Aşgabat şäher Geňeşiniň
Guramaçylyk bölüminiň müdiri.
