Ýakynda “Halkara parahatçylyk we ynanyşmak ýyly” mynasybetli Aman Kekilow adyndaky Mugallymçylyk mekdebinde “Ösüşleriň belentliklerine beslenen Halkara parahatçylyk we ynanyşmak ýylynyň buýsançly zenanlary” atly aýdym-sazly wagyz-nesihat çäresi geçirildi. Bu çärä Aşgabat şäher Büzmeýin etrap kazyýetiniň, Türkmenistanyň Demokratik partiýasynyň Büzmeýin etrap komitetiniň, Türkmenistanyň Magtymguly adyndaky Ýaşlar guramasynyň Aşgabat şäheriniň Büzmeýin etrap Geňeşiniň wekilleri hem-de mekdebiň mugallymlary we talyp ýaşlary gatnaşdylar.
Duşuşykda çykyş edenler täze taryhy döwürde döwletimiziň dünýädäki ornuny has-da berkitmek, halkara hyzmatdaşlyk, ynanyşmak we dostluk ýörelgelerine esaslanýan içeri we daşary syýasatyny, halkara başlangyçlaryny giňden wagyz etmek hem-de dünýä ýaýmak, Türkmenistanyň hemişelik Bitaraplygynyň şanly 30 ýyllygyny we halkymyzyň gadymdan gelýän parahatçylyk söýüjilik, hoşniýetlilik, ynsanperwerlik we myhmansöýerlik däplerini Ýer ýüzünde şöhratlandyrmak, raýatlarymyzyň Watançylyk ruhuny has-da belende götermek, ýaş nesli Garaşsyz, hemişelik Bitarap Türkmenistana uly buýsanç, çäksiz söýgi we wepalylyk ruhunda terbiýelemek hakynda buýsançly gürrüňler etdiler.
Çäräniň ahyrynda oňa gatnaşanlar Gahryman Arkadagymyzyň, hormatly Prezidentimiziň umumadamzat bähbitli beýik başlangyçlarynyň, döwletli işleriniň rowaçlyklara beslenmegini arzuw edip, ýaşlara okamaga, öwrenmäge, işlemäge döredip berýän giň mümkinçilikleri üçin köp sagbolsunlaryny aýtdylar.
Nurgözel ANNADURDYÝEWA,
Türkmenistanyň Magtymguly adyndaky
Ýaşlar guramasynyň Aşgabat şäheriniň
Büzmeýin etrap Geňeşiniň Guramaçylyk
bölüminiň esasy hünärmeni.
