Ýurdumyzyň orta mekdepleriniň 2-4-nji okuwçy gyzlaryň arasynda yglan edilen «Iň eýjejik gyzjagaz — 2025» atly bäsleşigiň Ahal welaýatynyň Kaka etrap tapgyry etrabyň 14-nji orta mekdebiň mejlisler jaýynda Türkmenistanyň Magtymguly adyndaky Ýaşlar guramasynyň etrap Geňeşi bilen etrap bilim bölüminiň bilelikde guramagynda örän gyzykly geçirilip, oňa mekdebara saýlama gözden geçirişlerinde öňe saýlanan okuwçy gyzjagazlar işjeňlikde gatnaşdylar.
Onda okuwçy gyzjagazlar türkmeniň milli egin-eşigini geýip döwrümizi şahyrana sözler bilen wasp etdiler, hormatly Prezidentimiz tarapyndan Berkarar döwletiň täze eýýamynyň Galkynyşy döwründe alnyp barylýan tutumly işleri, ata Watanymyzy, bagtyýar çagalygy, dost-doganlygy wasp edýän aýdym-sazlary ýerine ýetirdiler, zehin başarnygyny görkezdiler.
Bäsleşigiň dowamynda aýratyn tapawutlanan okuwçy gyzjagazlar ýüze çykaryldy. Şeýlelik-de «Iň eýjejik gyzjagaz — 2025» atly şadyýan bäsleşigiň etrap tapgyrynda 18-nji orta mekdebiň 4-nji synp okuwçysy Melike Parahadowa birinji, 15-nji orta mekdebiň 2-nji synp okuwçysy Ogulnabat Nepesowa ikinji, 10-njy orta mekdebiň 2-nji synp okuwçysy Gülnäz Begençmyradowa üçünji orna mynasyp boldy. Bäsleşigiň ýeňijilerine TMÝG-niň Kaka etrap Geňeşiniň hormat hatlary hem-de ýadygärlik sowgatlary dabaraly ýagdaýda gowşuryldy.
Azat HALMYRADOW,
Türkmenistanyň Magtymguly adyndaky
Ýaşlar guramasynyň Ahal welaýatynyň
Kaka etrap Geňeşiniň sanly ulgam
boýunça esasy hünärmeni.
