Türkmenistanyň Magtymguly adyndaky Ýaşlar guramasynyň Daşoguz welaýatynyň Saparmyrat Türkmenbaşy etrap Geňeşi, Saparmyrat Türkmenbaşy etrap Bilim bölümi bilen bilelikde Halkara Bitaraplyk güni mynasybetli «Merdana nesil-2025» atly şadyýan bäsleşiginiň etrap tapgyryny geçirdi. 13-nji orta mekdebiň mejlisler zalynda geçirilen bu bäsleşige etrabymyzyň umumy bilim berýän orta mekdepleriniň 3-5-nji synp okuwçy oglanlary gatnaşdylar.
Çykyş eden oglanlar bäsleşige taýýarlykly gelip, zehin-başarnyklaryny görkezdiler. Olar türkmen halkyna mahsus bolan merdanalyk, Watana bolan söýgini, ata-babalarymyzyň gahrymançylykly synmaz ruhuna belent sarpasyny, bagtyýar zamanamyzyň ýetilen üstünliklerini, ýürek buýsançlaryny çeper sözleriň üsti bilen beýan etdiler soňra okuwçy oglanlar ýekelikde şorta söz ýerine ýetirdiler şeýle-de hormatly Prezidentimiziň parasatly ýolbaşçylygynda Berkarar döwletiň täze eýýamynyň Galkynyşy döwründe amala aşyrylýan uly ösüşleri, bagtyýar çagalygy, dost-doganlygy wasp edip çykyş etdiler.
Bäsleşige gatnaşýan oglanjyklar bäsleşigiň şertleri bilen şatlyk-şowhun bilen çykyş etdiler. Eminler bäsleşigiň şertlerine laýyklykda oglanlaryň sahnada özlerini erkin we rahat alyp baryşlaryna, lybaslaryna, aýdym aýtmak başarnyklaryna, aýdymyň sözleriniň saz bilen sazlaşygyna, arassa sözleýişine, bellenilen wagtda şertleri ýerine ýetirişlerine, laýyklykda baha berdiler.
Bäsleşigiň ahyrynda eminleriň bahalarynyň jemlenmegi bilen etrap tapgyrynyň ýeňijileri yglan edildi 2-nji orta mekdebiniň okuwçysy Jumamyradow Eldar 1-nji orna, 94-nji orta mekdebiniň okuwçysy Meredow Meretgeldi 2-nji orna, 14-nji orta mekdebiniň okuwçysy Arazgeldiýew Medet 3-nji orna mynasyp bolandygy emin agzalary tarapyndan yglan edildi. Etrap tapgyrynyň ýeňijileri «Merdana nesil-2025» atly şadyýan bäsleşiginiň welaýat tapgyrynda gatnaşmaga hukuk gazandylar. «Merdana nesil-2025» atly şadyýan bäsleşiginiň etrap tapgyryna gatnaşyp, çykyş eden ähli okuwçy oglanlara Daşoguz welaýatynyň Saparmyrat Türkmenbaşy etrap Geňeşiniň sowgatlary hem-de Hormat hatlary gowşuryldy.
Begli ISGENDEROW,
Türkmenistanyň Magtymguly adyndaky Ýaşlar guramasynyň
Daşoguz welaýatynyň Saparmyrat Türkmenbaşy etrap Geňeşiň başlygy.
