Ýakynda paýtagtymyz Aşgabadyň gözel künjeginde ýerleşýän 8-nji orta mekdebinde Türkmenistanyň Bilim ministrliginiň, Türkmenistanyň Magtymguly adyndaky Ýaşlar guramasynyň Merkezi Geňeşi bilen bilelikde Halkara Bitaraplyk güni hem-de Birleşen Milletler Guramasynyň Baş Assambleýasy tarapyndan Türkmenistanyň hemişelik Bitaraplyk derejesiniň ykrar edilmeginiň 30 ýyllygy mynasybetli ýurdumyzyň umumybilim berýän mekdepleriniň 3 – 5-nji synplarynda okaýan okuwçy oglanlarynyň arasynda «Merdana nesil – 2025» atly şadyýan bäsleşiginiň Aşgabat şäher tapgyry geçirildi.
Bäsleşik hormatly Prezidentimiziň «Ýaş nesillerimiziň sagdyn, bagtyýar ösüp ulalmaklary, watançy, päk ahlakly, merdana we halal adamlar bolup ýetişmekleri biziň esasy maksatlarymyzyň biridir, ýurdumyzyň durnukly ösüşiniň şertidir» diýen sözlerinden ugur alyp, ýurdumyzyň çagalarynyň, okuwçy ýaşlarynyň ruhy taýdan ösmegini, ahlak, edep häsiýetleriniň berkemegini gazanmak, şeýle-de milli medeniýetimizi we sungatymyzy yzygiderli ösdürmäge, ösüp gelýän ýaş nesliň sungat äleminde zehinli hünärmenler bolup ýetişmeklerini gazanmaga, ýaşlaryň döredijilik ukyplaryny has-da kämilleşdirmäge gönükdirilen döwlet syýasatymyzy iş ýüzünde durmuşa geçirmek maksady bilen, her ýylyň dowamynda geçirilip umumybilim berýän mekdepleriniň 3 – 5-nji synplarynda okaýan okuwçy oglanlar öz zehinlerini görkezdiler. Bu bäsleşik ilki etrap derejesinde geçirilip, şol ýerde zehinli çagalary saýlanyp Aşgabat şäher tapgyryna hödürlenýär. Soňra şäher tapgyrynda çagalar zehinlerini görkezip, jemleýji döwlet tapgyryna gatnaşmaga hukuk gazanýarlar.
Bäsleşigiň ahyrynda Eminler toparynyň adalatly bahalary netijesinde I orna Birleşen Arap Emirlikleriniň Prezidenti Şeýh Zaid Bin Sultan Al Nahhaýan adyndaky Döwletliler köşginiň 4-nji synp okuwçysy Meretdurdyýew Babajan, II orna Aşgabat şäheriniň 124-nji orta mekdebiniň 5-nji synp okuwçysy Döwletgeldiýew Döwrangeldi, III orna bolsa Türkmenistanyň Gahrymany Atamyrat Nyýazow adyndaky zehinli ýaşlar mekdebiniň 4-nji synp okuwçysy Yhlas Ataýew hem-de Aşgabat şäheriniň 24-nji orta mekdebiniň 5-nji synp okuwçysy Myrat Täşliýew mynasyp bolup, olar döwlet tapgyryna gatnaşmaga hukuk gazandylar.
Şadyýan bäsleşige gatnaşan okuwçy oglanlara Türkmenistanyň Magtymguly adyndaky Ýaşlar guramasynyň Aşgabat şäher Geňeşi tarapyndan Hormat hatlary hem-de ýadygärlik sowgatlar gowşuryldy.
Gülälek BAÝRAMALYÝEWA,
Türkmenistanyň Magtymguly adyndaky Ýaşlar guramasynyň
Aşgabat şäher Geňeşiniň Medeniýet we köpçülikleýin
habar beriş bölüminiň baş hünärmeni.
