Ýakynda Türkmenistanyň Magtymguly adyndaky Ýaşlar guramasynyň Balkan welaýatynyň Gyzylarbat etrap Geňeşiniň, etrap jemgyýetçilik guramalarynyň we bilim bölüminiň bilelikde guramagynda «Bagy-bossanlyga gülzarlyga beslenen iň gowy çagalar bagy» atly bäsleşik geçirildi.
Bu bäsleşik etrabymyzdaky bilim edaralaryny bagy-bossanlyga öwürmek maksady bilen geçirildi. Bäsleşikde Gyzylarbat etrabynyň çägindäki çagalar baglary gatnaşyp, olaryň içinden Baş baýraga Balkan welaýatynyň Gyzylarbat etrabynyň 23-nji çagalar bakja-bagy, I orna Balkan welaýatynyň Gyzylarbat etrabynyň 9-njy çagalar bakja-bagy, II orna Balkan welaýatynyň Gyzylarbat etrabynyň 27-nji çagalar bakja-bagy, III orna bolsa Balkan welaýatynyň Gyzylarbat etrabynyň 17-nji çagalar bakja-bagy mynasyp boldy.
Bu bäsleşige Balkan welaýatynyň Gyzylarbat etrabynyň bilim bölüminiň hünärmeni Zeýnepgül Tuwakowa ýolbaşçylyk edip, bäsleşige gatnaşan çagalara ýörite bilim bölümi tarapyndan Hormat hatlary gowşuryldy. Bäsleşigiň dowamynda Türkmenistanyň Magtymguly adyndaky Ýaşlar guramasynyň Balkan welaýatynyň Gyzylarbat etrap Geňeşi we beýleki jemgyýetçilik guramalary tarapyndan ýeňiji bolan çagalar bakja-baglaryna ýadygärlik sowgatlar gowşuryldy.
Bäsleşigiň ahyrynda oňa gatnaşanlar, ýaş nesillere şeýle ajaýyp mümkinçilikleri döredip berýän Gahryman Arkadagymyza we Arkadagly Gahryman Serdarymyza alkyş sözlerini aýtdylar.
Gülruh NAZAROWA,
Türkmenistanyň Magtymguly adyndaky Ýaşlar guramasynyň
Balkan welaýatynyň Gyzylarbat etrap Geňeşiniň
Guramaçylyk bölüminiň esasy hünärmeni.
