Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan “Milli miras – nesillere görelde” atly gepleşigiň täze sany ýazgy edildi. Onda Halkara parahatçylyk we ynanyşmak ýylynda durmuşa geçirilýän döwletli işler, ata-babalarymyzdan gelýän milli ýol-ýörelgelerimiz, şeýle hem Türkmenistanyň hemişelik Bitaraplygynyň 30 ýyllygyna bagyşlanyp “Awaza” milli syýahatçylyk zolagynda geçiriljek “Häzirki zaman jemgyýetinde zenanlaryň orny: durnukly ösüşiň bähbidine halkara hyzmatdaşlygy ösdürmek” atly halkara maslahatyna görülýän taýýarlyk işleri barada giňişleýin gürrüňler edildi.
Şeýle hem gepleşigiň dowamynda türkmen halkynyň milliligini dünýä ýaýmakda uly işleri durmuşa geçirýän türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza köp sag bolsun aýdyp, janlarynyň sag, ömürleriniň uzak bolmagyny, il-ýurt bähbitli işleriniň elmydama rowaçlyklara beslenmegini arzuw etdiler.
Mahym SELIMOWA,
Türkmenistanyň Magtymguly adyndaky
Ýaşlar guramasynyň Merkezi Geňeşiniň
Medeniýet we köpçülikleýin habar beriş
bölüminiň baş hünärmeni.
