Şu gün Türkmenistanyň Magtymguly adyndaky Ýaşlar guramasynyň Merkezi Geňeşiniň we “Ýaşlyk” teleradioýaýlymynyň bilelikde guramagynda 12-nji awgustda “Awaza” milli syýahatçylyk zolagynda geçirilen birinji Hazar ykdysady forumyna bagyşlanyp brifing duşuşygy geçirildi. Oňa Ýaşlar guramasynyň işeňňir agzalary ýokary ruhubelentlikde gatnaşdylar. Jemgyýetçilik guramalarynyň merkezi binasynyň giň foýesinde geçirilen bu duşuşygy Türkmenistanyň Magtymguly adyndaky Ýaşlar guramasynyň Merkezi Geňeşiniň başlygy Soltangeldi Babaýew alyp bardy.
Geçirilen brifing duşuşygynda çykyşlaryň birnäçesi diňlenip, olarda esasan hormatly Prezidentimiziň ýolbaşçylygynda türkmen taryhyna altyn harplar bilen ýazylan birinji Hazar ykdysady forumynyň baý mazmuny, döwlet we dünýä derejesindäki ähmiýeti, şeýle-de bu forumyň çäginde geçirilen Türkmenbaşynyň Halkara deňiz portunda Hazar innowasion tehnologiýalar halkara sergisi, “Türkmen sährasy – 2019” halkara awtosergisi, Hazarýaka döwletleriň ykdysadyýet, ulag ministrleriniň hem-de işewürleriniň duşuşyklary, birža söwdalary, ikitaraplaýyn duşuşyklar dogrusynda täsirli gürrüňleri etdiler. Çykyşlaryň dowamynda duşuşyga gatnaşyjy ýaşlar özlerini gyzyklandyrýan sowallary berdiler we kanagatlanarly jogaplary aldylar. Gyzykly we täsirli geçen bu duşuşyk oňa gatnaşyjylaryň her birinde ýakymly duýgulary galdyrdy.
Umyda KAKAÝEWA,
TMÝG-niň Merkezi Geňeşiniň habarçysy.
