Berkarar döwletimiziň täze eýýamynyň Galkynyşy döwründe “Arkadag Serdarly bagtyýar ýaşlar ýylynda” ösüp gelýän ýaş nesillerimizi watançylyk ruhunda terbiýelemek, olaryň berk bedenli, sagdyn ruhly, ata watanymyza wepaly ýaşlar bolup ýetişmekleri ugrunda yzygiderli işler durmuşa geçirilýär. Kitaphanalarymyzyň esasy okyjylary bolan ýaş nesillerimiz bitewi elektron kitaphana ulgamynyň mümkinçiliklerinden peýdalanyp öz bilimlerini has-da artdyrýarlar. Kitaphanamyzda TMÝG-niň Balkan welaýatynyň Bereket etrap geňeşi bilen bilelikde mekdep okuwçylarynyň arasynda türkmen ýazyjy şahyrlarynyň ömri we döredijiliginden, eserlerinden birnäçe bäsleşikleri yzygiderli geçirilýär.Arkadagly Serdarymyzyň, parasatly baştutanlygynda hormatly Prezidentimiziň “Dana Pyragyny sarpalamak türkmen edebiýatyny arşa götermekdir, halkymyzyň milli gymmatlyklaryny dünýä ýaýmakdyr” diýen parasatly ýörelgelerinden ugur alyp, akyldar şahyr Magtymguly Pyragynyň 300 ýyllygy mynasybetli, TMÝG-niň Balkan welaýatynyň Bereket etrap geňeşi, Bereket merkezi kitaphanasy bilen bilelikde kitaba sarpa goýup, kitap dünýäsine çuňňur aralaşýan giň gözýetimli, şygryýet we döredijilik gözlegleri bilen meşgullanýan Pyragynyň şygyrlaryny, döredijiligini ýatdan wasp edýän kitaphana okyjylarynyň arasynda “Arzuwlan zamanaň geldi Pyragy” ady bilen okyjylar konferensiýasyny geçirdi. Şeýle çäreleriň yzygiderli geçirilmegi watanymyzyň gelejegi bolan ýaş nesillerimizi döredijilikli okamaga bilimlerini has-da berkitmäge ruhlandyrýar. Goý ýaş nesillerimiziň çuňňur bilim almagy olaryň giň dünýägaraýyşly, ylymly, bilimli, ösen düşünjeli adamalar bolup ýetişmekleri üçin giň mümkinçilikleri döredýän Gahryman Arkadagymyzyň, peder ýoluny dowam edýän Arkadagly Serdarymyzyň janlary sag, belent başlary aman, tutýan her bir tutumly işleri elmydama rowaçlyklara beslensin!
Orazgül HUDAÝNAZAROWA,
Türkmenistanyň Magtymguly adyndaky
Ýaşlar guramasynyň Bereket etrap
Geňeşiniň işjeň agzasy Bereket
etrabynyň medeniýet bölüminiň
merkezi kitaphanasynyň kitaphanaçysy.
