Berkarar döwletiň täze eýýamynyň Galkynyşy döwrüniň Arkadag Serdarly bagtyýar ýaşlar ýylynda Gahryman Arkadagymyzyň, Arkadagly Gahryman Serdarymyzyň taýsyz tagallalary netijesinde ýurdumyzda ynsan saglygyny goramak ähli zatdan ileri tutulýar. Ähli üstünlikler, rowaçlyklar saglykdan başlanýar. Muňa esaslanyp, ýakynda Türkmenistanyň Magtymguly adyndaky ýaşlar guramasynyň Balkan welaýatynyň Gyzylarbat etrap Geňeşi, Gyzylarbat etrabynyň 2-nji sport mekdebi, beýleki jemgyýetçilik gurmalary hem-de Gyzylarbat etrap häkimligi bilelikde sport mekdebiniň açyk birinjiliginde sportuň futbol görnüşi boýunça bäsleşik geçirdi. Bu bäsleşik «Sarydaş» we «Arkaç» toparlarynyň gatnaşmagynda geçirilip örän täsirli we çekeleşikli boldy. Gyzgalaňly geçirilen bäsleşikde «Arkaç» topary üstün çykyp ýeňiş gazanmagy başardy. Ýeňiji bolan topara Türkmenistanyň Magtymguly adyndaky Ýaşlar guramasynyň Gyzylarbat etrap Geňeşiniň we beýleki jemgyýetçilik guramalarynyň ýadygärlik sowgatlary dabaraly ýagdaýda gowşuryldy.
Şöhrat MÄMMETHANOW,
TMÝG-niň Balkan welaýat Gyzylarbat
etrap Geňeşiniň Guramaçylyk bölüminiň müdiri.
