Berkarar döwletiň täze eýýamynyň Galkynyşy döwründe durmuşa geçirilýän beýik işler halkymyzyň bagtyýar ýaşaýşyny has-da ösdürmek bilen, halkara derejesindäki dürli ugurlara degişli çäreleriň, bäsleşikleriň geçirilýän ýurdy hökmünde ata Watanymyzy dünýä meşhur etdi.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň ýurdumyzyň sport abraýynyň dünýä ýüzünde belende göterilmegi üçin başyny başlan işleri hormatly Prezidentimiziň baştutanlygynda döwrebap derejede ösdürilýär. Bu gün ýurdumyz dünýäde iri halkara sport bäsleşiklerini geçirmäge ukyply döwlet hökmünde ykrar edildi. Ýurdumyzda dürli derejedäki ýaryşlaryň geçirilmegi ýola goýuldy. Sport ulgamyna iň täze tehnologiýalar giňden ornaşdyrylýar. Ýurdumyzyň ähli ýerlerinde dünýä ölçeglerine laýyk gelýän stadionlar, sport toplumlary, ýöriteleşdirilen sport mekdepleri gurlup ulanmaga berildi. Bu işleriň hemmesi netijeli sporty ösdürmäge ýardam berýär.
Ýurdumyz parahatçylygyň, dost-doganlygyň mekany hökmünde tanalýar. Asuda ýurdumyzda geçirilýän halkara sport çäreleri hem dost-doganlygyň aýdyň beýanydyr. Sport — sagdynlyk. Sport — dostluk. Şonuň üçin hem sportuň ösdürilmegi sagdynlygyň pugtalandyrylmagydyr, dostlugyň berk binýadydyr.
Watanymyzyň paýtagty Aşgabatda Kuraş boýunça dünýä çempionatyny geçirmäge hem ähli taýýarlyklar görüldi.
Kuraş boýunça dünýä çempionaty bu ugruň ösmeginde, dost-doganlyk gatnaşyklaryň pugtalanmagynda aýratyn ähmiýete eýedir. Hormatly Prezidentimiziň taýsyz tagallasy netijesinde Kuraş boýunça dünýä çempionatyna Türkmenistandan türgenleriň wekilçilik etmegi has-da buýsançly bolup, munuň özi türkmen ýaşlarynyň ukyp-başarnyklaryny açmaklaryna giň mümkinçilikleriň döredilmegidir.
Hormatly Prezidentimiziň taýsyz tagallasy netijesinde türkmen ýaşlarynyň öz ukyp-başarnyklaryny sportda görkezmekleri üçin ýurdumyzda dürli sport çäreleri ýygy-ýygydan geçirilip durulýar. Şeýle halkara çärelere türkmen ýaşlary uly höwes bilen gatnaşýarlar.
Ýurdumyzda we dünýäde geçirilýän sport çärelerine talyp ýaşlar hem işjeň gatnaşýarlar. Ýagşygeldi Kakaýew adyndaky Halkara nebit we gaz uniwersitetiniň talyplary hem bedenterbiýe we sport bilen yzygiderli meşgullanýarlar hem-de geçirilýän sport ýaryşlarynda üstünlikli çykyş edýärler. Bu bolsa ýaşlaryň sagdynlygynyň aýdyň beýanydyr.
Türkmenistanyň çempionatynda dzýudo boýunça 60 kg agramda bu uniwersitetiň 1-nji ýyl talyby Mekan Remezanowyň 1-nji orna, Ali Agamyradowyň bolsa 2-nji orna mynasyp bolmagy hormatly Prezidentimiziň görkezmeleriniň ýerlerde iş ýüzünde amala aşyrylýandygyna doly şaýatlyk edýär.
Ýurdumyzyň her bir ugurda uly ösüşleri gazanyp, belent üstünlikler bilen dünýä döwletleriniň arasynda giň meşhurlyga eýe bolmagy ähli ildeşlerimizde buýsanç döredýär. Ýurdumyzyň sport ulgamyny halkara derejede ösdürýän Gahryman Arkadagymyzyň, Arkadagly Gahryman Serdarymyzyň janlary sag bolsun, beýik işleri üstünliklere beslensin!
Döwletmyrat SUHANOW,
Ýagşygeldi Kakaýew adyndaky Halkara nebit we
gaz uniwersitetiniň talyplar sport klubynyň başlygy.
«Türkmen sporty» gazeti.
21.11.2023 ý.
