Berkarar döwletiň täze eýýamynyň Galkynyşy döwründe hormatly Prezidentimiz Arkadagly Gahryman Serdarymyzyň ýolbaşçylygynda Magtymguly Pyragynyň 300 ýyllyk toýunyň uly dabara bilen bellenjekdigi türkmen halkyny diýseň begendirýär. Eziz Diýarymyzda 2024-nji ýylda geçiriljek türkmen edebiýatynyň nusgawy şahyrynyň şanly senesi mynasybetli ýurdumyzda giň gerimli birnäçe çäreleri geçirmeklik meýilleşdirilýär. Häzirki wagtda ýurdumyzda bu senä taýýarlyk işleri dowam edýär. Beýik şahyryň ýubileýine meýilleşdirilen çäreler onuň baý edebi mirasyny has çuňňur öwrenilmegine we giňden ýaýramagyna goşant goşar.
Bagtyýar türkmen halky bu gün beýik akyldar, söz ussady Magtymguly Pyragynyň arzuwlan zamanasynda - berkarar döwletde ýaşamak bilen, nusgawy şahyryň döredijiligine, edebi mirasyna uly hormat goýýar. Onuň galdyran mirasy diňe bir türkmen halkynyň däl, eýsem tutuş türki dilli halklaryň hem edebiýatynyň taryhynda ähmiýeti has ýokary bolup, adamzat bilimleriniň hazynasyna möhüm goşant goşup, dünýä edebiýatynyň aýrylmaz bölegine öwrüldi.
Ýurdumyzda giňden dabaralanýan şeýle çäreleriň biri 2023-nji ýylyň 22-nji noýabrynda Balkan welaýatynyň Balkanabat şäheriniň Ýagşygeldi Kakaýew adyndaky Halkara nebit we gaz uniwersitetiniň Balkanabat bölüminde geçirildi. Gündogaryň beýik akyldary Magtymguly Pyragynyň doglan gününiň 300 ýyllygy mynasybetli geçirilen aýdym-sazly çärede çykyş edenler Magtymguly Pyragynyň şahyrana mirasy, onuň eserleriniň umumyadamzat derejesindäki ähmiýeti, şygyrlarynyň adamlarda oňat häsiýetleri terbiýelemekdäki uly orny barada giňişleýin beýan etdiler. Çäräniň ahyrynda çykyş edenler türkmen halkynyň Milli Lideri Gahryman Arkadagymyza, Arkadagly Gahryman Serdarymyza tüýs ýürekden sagbolsunlaryny aýdyp, il-ýurt bähbitli beýik işleriniň hemişe rowaçlyklara beslenmegini arzuw etdiler.
Gülbahar REJEPOWA,
TMÝG-niň Balkanabat şäher Geňeşiniň
guramaçylyk bölüminiň müdiri.
