Berkarar döwletiň täze eýýamynyň Galkynyşy döwründe ýurdumyz ähli ugurlarda beýik ösüşlere beslenýär. Şol ösüşlerde ýaşlaryň aýratyn ornunyň bolmagy buýsandyryjydyr. Arkadag Serdarly bagtyýar ýaşlar ýylynda amala aşyrylan giň gerimli işler, gazanylan beýik netijeler taryha altyn harplar bilen ýazylar.
27-nji dekabrda paýtagtymyzdaky Türkmenistanyň Söwda-senagat edarasynda Arkadag Serdarly bagtyýar ýaşlar ýylyna bagyşlanyp halkara ylmy-amaly maslahat we sergi geçirildi. Halkara forumyň açylyş dabarasyna Türkmenistanyň Mejlisiniň Başlygy, Halk Maslahatynyň Diwanynyň iş dolandyryjysy, Hökümet agzalary, ministrlikleriň, pudaklaýyn dolandyryş edaralarynyň, harby we hukuk goraýjy edaralaryň, jemgyýetçilik guramalarynyň, köpçülikleýin habar beriş serişdeleriniň ýolbaşçylarydyr wekilleri, Aşgabat we Arkadag şäherleriniň häkimleri, daşary döwletleriň, halkara guramalaryň ýurdumyzdaky diplomatik wekilhanalarynyň ýolbaşçylary, talyplar we daşary ýurtlardan köp sanly myhmanlar gatnaşdylar. Şanly ýylyň jemlerine bagyşlanan halkara ylmy-amaly maslahatyna gatnaşanlar umumy mejlisde pudaklaýyn bölümçelerde her bir güni uly üstünlikler, milli we halkara ähmiýetli wakalar bilen şöhratlandyrylan 2023-nji ýylda ýurdumyzyň depginli ösüşine, öňe gitmegine gönükdirilen maksatlaryň üstünlikli amala aşyrylmagyna mynasyp goşantlaryny goşan ýaşlaryň çykyşlaryny diňlediler, ýurdumyzyň halk hojalygynyň dürli ugurlarynda gazanylan üstünlikler bilen tanyşdylar. Foruma bagyşlanan sergide ýaşlaryň ylymda, bilimde, medeniýetde, sungatda, sportda, ykdysadyýetde, innowasion tehnologiýalar ulgamynda, oba hojalygynda türkmen ýaşlarynyň ajaýyp zehinleri bilen ýeten sepgitleri görkezildi.
Şöhrat MÄMMETHANOW,
TMÝG-niň Balkan welaýatynyň Gyzylarbat etrap Geňeşiniň Guramaçylyk bölüminiň müdiri.
