Uzak menzilleri, ýollary aşyp,
Öz-özüňi, öz ruhuňy taplamak.
Sözleriň içinden herýan göçeňde,
Mertebäňi, ygraryňy saklamak -
Pyragyň gaşynda goşgy okamak.
Ýyllar ýyllar bilen asyra dönýär,
Jümleler paýhasdan asala dönýär,
Ýer ýyllyk ýol geçip bahara dönýär,
Içen suwuň, iýen duzuň haklamak -
Pyragyň gaşynda goşgy okamak.
Üç asyrlyk ýoldan sesi gelýär, heý,
Ýüregiňde ne bardygyn bilýär, heý,
Bu gün bize ýakyn geldi dünýä, heý,
Geçmiş, şu gün, geljegiňi ýatlamak -
Pyragyň gaşynda goşgy okamak.
Göwnüňi gubardan saplamak bardyr,
Çagalaň başyny sypamak bardyr
Barlygy özüňçe synlamak bardyr,
Durmuş güllerinden nektar toplamak -
Pyragyň gaşynda goşgy okamak.
Bahar-ýazlar geler jemaly bilen,
Aýdym-sazlar geler ykbaly bilen,
Paýhas umman ol Magtymguly bilen
Has başgaça ýazmak, başga okamak -
Pyragyň gaşynda goşgy okamak.
Suraý BABANYÝAZOWA,
TMÝG-niň Mary welaýatynyň Sakarçäge
etrap Geňeşiniň hünärmeni.
