Şu gün Türkmenistanyň Magtymguly adyndaky Ýaşlar guramasynyň Daşoguz welaýat Geňeşi Daşoguz welaýat medeniýet müdirligi bilen bilelikde, “Pähim-paýhas ummany Magtymguly Pyragy” ýyly mynasybetli, halypa şahyrlaryň hem-de döredijilik bilen meşgullanýan ýaşlaryň gatnaşmagynda döredijilik duşuşygyny (brifing) geçirildi. Daşoguz welaýat kitaphanasynda geçirilen brifinge Ýaşlar guramasynyň Daşoguz welaýat, şäher, etrap Geňeşleriniň işgärleri, işjeň agzalary, döredijilik bilen meşgullanýan ýaşlar gatnaşdylar. Duşuşykda “Garagum” žurnalynyň bölüm redaktory, Türkmenistanyň Halk ýazyjysy Orazguly Annaýew, “Biznes reklama” gazetiniň baş redaktory Seýitmyrat Geldiýew, Daşoguz welaýat teleradio studiýasynyň gepleşikleri gurnaýjy we taýýarlaýjysy Dädebaý Nartyýew, S.Türkmenbaşy etrabynyň 23-nji orta mekdebiniň mugallymy, Ýaşlar baýragynyň eýesi Bägül Särsenowa, Akdepe etrabynyň 4-nji orta mekdebiniň mugallymy Dürli Öräýewa, Daşoguz welaýat onkologiýa hassahanasynyň radiolog-laboranty Kemal Kömekow dagylar çykyş etdiler. Duşuşygy “Ýaşlyk” teleradioýaýlymynyň gepleşikleri gurnaýjy we taýýarlaýjysy Oguljemal Hoşgeldiýewa alyp bardy.
.jpg)
Döredijilik duşuşygynda çykyş edenler Pyragynyň ömri we döredijiligi, ÝUNESKO-nyň Baş maslahatynda kabul edilen Karara laýyklykda, Magtymguly Pyragynyň doglan gününiň 300 ýyllygynyň 2024 – 2025-nji ýyllarda ÝUNESKO bilen bilelikde bellenilip geçiljek şanly seneleriň sanawyna goşulmagynyň akyldar şahyryň doglan gününiň 300 ýyllygyna ajaýyp sowgat bolandygy, şahyryň belent adynyň ýylymyzyň şygarynda berkidilmeginiň onuň edebi mirasyny, sarpasyny dünýäde dabaralandyrýan halkymyz üçin baýramçylyk ruhundaky çagyryş bolandygy barada giňişleýin we uly buýsanç bilen bellediler.
Şeýle-de, brifingde halypa şahyrlar bilen dörediji ýaşlaryň arasynda sorag-jogaplar alşyldy.
2024-nji ýylyň döwrebap atlandyrylmagy hem-de dana şahyryň döredijiliginiň ähmiýeti dogrusynda beýan edilen buýsançly söhbetlerde döredijilige aýratyn sarpa goýýan, şahsyýetlerimiziň ruhuny galkyndyrýan türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza alkyş sözleri aýdyldy.
Duşuşyk “Ýaşlyk” teleradioýaýlymy tarapyndan ýazgy edildi.
Aýnur ÝUSUPOWA,
TMÝG-niň Daşoguz welaýat Geňeşiniň bölüm müdiri.
