Türkmenistanyň Magtymguly adyndaky Ýaşlar guramasynyň Merkezi Geňeşiniň Türkmenistanyň Bilim ministrligi bilen bilelikde ýurdumyzyň orta mekdepleriniň 2 — 4-nji synp okuwçy gyzlarynyň arasynda yglan eden «Iň eýjejik gyzjagaz — 2024» atly şadyýan bäsleşigiň Ahal welaýatynyň Kaka etrap tapgyry etrabyň 14–nji orta mekdebiniň mejlisler jaýynda uly ruhubelentlikde geçdi. Etrabyň umumybilim berýän mekdeplerinden gelen şadyýan gyzjagazlar bäsleşigiň şertleri esasyndaky çykyşlarynda eziz Watanymyza, milli gymmatlyklarymyza bolan söýgüsini, ajaýyp döwrümize, bagtyýar çagalyga bolan buýsanjyny joşgun bilen beýan etdiler.
Özboluşly baýramçylyga öwrülen bäsleşigiň dowamynda emin agzalary tarapyndan aýratyn tapawutlanan gyzjagazlar ýüze çykarylyp, ýeňijiler kesgitlenildi. Şeýlelikde, «Iň eýjejik gyzjagaz — 2024» atly şadyýan bäsleşigiň Kaka etrap tapgyrynda birinji orna etrabyň 10-njy orta mekdebiniň 4-nji “Ç” synp okuwçysy Aýlar Mürçäýewa, ikinji orna 5-nji orta mekdebiniň 4-nji “Ç” synp okuwçysy Merýem Röwşenowa, üçünji orna 18-nji orta mekdebiniň 2-nji “A” synp okuwçysy Gülhanym Allamyradowa dagylar mynasyp boldy. Bäsleşigiň ýeňijilerine TMÝG-niň Kaka etrap Geňeşiniň Hormat hatlary hem-de ýadygärlik sowgatlary dabaraly ýagdaýda gowşuryldy.
Azat HALMYRADOW,
TMÝG-niň Ahal welaýatynyň Kaka etrap Geňeşiniň Guramaçylyk
bölüminiň sanly ulgam boýunça esasy hünärmeni.
