Lebap welaýatynyň Seýitnazar Seýdi adyndaky döwlet sazly-drama teatrynda «Milli mirasyň galkynýan zamanasy» atly dabaraly maslahat geçirildi. Türkmenistanyň Zenanlar birleşiginiň Milli Geňeşiniň, Kärdeşler arkalaşyklarynyň Milli merkeziniň we ÝUNESKO-nyň işleri barada Türkmenistanyň milli toparynyň Lebap welaýat häkimligi bilen bilelikde guramagynda geçirilen bu maslahata welaýatymyz wekilleri, medeniýet we sungat ussatlary, talyplar işjeň gatnaşdylar.
Teatryň girelgesinde ýaýbaňlandyrylan aýdym-sazly çykyşlardyr serginiň guralmagy maslahatyň täsirliligini has-da artdyrdy. Bagşylar toparynyň ýerine ýetiren aýdymlarynda ajaýyp döwrümiz, medeniýetimiz we milli gymmatlyklarymyz wasp edildi. Sergide ýerleşdirilen gymmatlyklar hem myhmanlaryň ünsüni özüne çekdi. Welaýatymyzyň nakgaşçylarynyň eserleri sergä özboluşly bezeg berdi.
Maslahatda edilen çykyşlarda halkymyzyň ÝUNESKO-nyň Adamzadyň maddy däl medeni mirasynyň sanawyna girizilen gymmatlyklaryny dogrusynda giňişleýin söhbet edildi. Şeýle hem çykyşlarda medeniýet we sungat ulgamynda halkara hyzmatdaşlygyny ösdürmekde alnyp barylýan işler dogrusynda aýdyldy. Dabaraly maslahatda Berkarar döwletiň täze eýýamynyň Galkynyşy döwrüniň milli mirasymyzyň galkynýan zamanasyna öwrülendigi aýratyn nygtaldy. Bellenilişi ýaly, Gahryman Arkadagymyzyň we Arkadagly Gahryman Serdarymyzyň taýsyz tagallalary bilen biz soňky ýyllarda milli gymmatlyklarymyz ÝUNESKO-nyň Adamzadyň maddy däl medeni mirasynyň sanawyndan aýratyn orun alýar. Bu ykrarnamalary gazanmakda ÝUNESKO-nyň işleri barada Türkmenistanyň milli toparynyň hyzmatlary uludyr. Häzirki wagtda bu topar milli gymmatlyklarymyzyň ýene-de birnäçesini abraýly sanawa hödürlemek boýunça netijeli işleri alyp barýar.
Maslahatyň dowamynda Lebabyň Seýitnazar Seýdi adyndaky döwlet sazly-drama teatrynyň sahna ussatlary molla Ependiniň şorta sözleri esasynda sahnalaşdyrylan gysgajyk sahnalary hem görkezdiler. Sungat ussatlarynyň çykyşlary ildeşlerimize ruhubelent çaýdy. Edilen çykyşlarda milli mirasymyzy öwrenmekde, ony dünýä ýaýmakda we gorap saklamakda giň gerimli işleri durmuşa geçirýän Milli Liderimize we hormatly Prezidentimize köp sagbolsun aýtdylar.
Dinara KARIMOWA,
TMÝG-niň Lebap welaýat Geňeşiniň Guramaçylyk
bölüminiň baş hünärmeni.
