Şeýle at bilen Änew şäherindäki Mukaddeslik meýdançasynda Bütindünýä saglyk güni mynasybetli geçirilen medeni-sport sagaldyş çäresini Türkmenistanyň Magtymguly adyndaky Ýaşlar guramasynyň Ahal welaýat Geňeşi, welaýatyň sport we bedenterbiýe baradaky Baş müdirligi, welaýat Medeniýet müdirligi bilelikde gurady. Welaýatyň dürli ýerlerinden gelen ýaşlaryň gatnaşmagynda geçirilen çärä medeniýet we sungat ussatlarynyň sporty, sagdyn durmuş ýörelgelerini wasp edýän aýdym-saz, tans çykyşlary ruhubelentlik çaýdy.
Ýurdumyz sagdynlygyň, ruhubelentligiň we bagtyýarlygyň mekany hökmünde bütin dünýäde uly meşhurlyga eýedir. Sport-sagaldyş hereketini, köpçülikleýin bedenterbiýäni ösdürmek ugrunda edilýän tagallalaryň çäginde Diýarymyzyň sebitleridir paýtagtynda bina edilýän sport maksatly desgalar sport ussatlarynyň kemala gelmegine şert döredýär. Şonuň bilen baglylykda, Ahal welaýatynda sporty özüne hemra edinýän ýaşlaryň sany barha artýar. Şeýle ruhubelent ýaşlar Bütindünýä saglyk güni mynasybetli geçirilen çärede sportuň dürli görnüşleri boýunça görkezme çykyşlaryny ýerine ýetirdiler.
Şol günki ruhubelentlige beslenen çäre Ak bugdaý etrabynyň sport mekdebinde sportuň dürli görnüşleri boýunça ýaryşlar bilen dowam etdi.
Jeýhun SAPARGULYÝEW,
TMÝG-niň Ahal welaýatynyň
Ak bugdaý etrap Geňeşiniň başlygy.
