Ýaňy-ýakynda Türkmenistanyň Magtymguly adyndaky Ýaşlar guramasynyň Daşoguz welaýatynyň Akdepe etrap Geňeşiniň, etrabyň bilim we medeniýet bölümleriniň, Türkmenistanyň Demokratik partiýasynyň etrap komitetiniň bilelikde guramagynda, Gündogaryň beýik akyldary Magtymguly Pyragynyň doglan gününiň 300 ýyllygy mynasybetli, körpe alypbaryjylaryň arasynda “Ýaşlar – Watanyň daýanjy, biz – zamanaň nowça genji” atly bäsleşigiň Daşoguz welaýatynyň Akdepe etrap tapgyry geçirildi. Bäsleşigiň maksady “Pähim-paýhas ummany Magtymguly Pyragy” ýylynda eziz Watanymyzda gazanylýan üstünlikleri wasp etmekden, halkymyzyň dilewarlyk, ugurtapyjylyk däp-dessurlaryna sarpa goýýan, hoşsözli, diňleýjileriň göwnüni açyp, ruhuny göterip bilýän, ýurdumyzda geçirilýän baýramçylyk dabaralarynda çykyş edip biljek ýaş, zehinli körpeleri ýüze çykarmakdan ybarat bolup durýar. Oňa etrabyň orta mekdepleriniň 3 – 4 – 5-nji synp okuwçylary gatnaşdylar. Bäsleşigiň nobatdaky tapgyry ýokary guramaçylyk ýagdaýynda geçirildi.
Netije-de, 55-nji orta mekdebiň 5-nji synp okuwçysy Mulkomar Garlyýew 1-nji orna, 112-nji orta mekdebiň 5-nji synp okuwçysy Gülsere Orazbaýewa 2-nji orna, 20-nji orta mekdebiň 5-nji synp okuwçysy Lälezar Gurbanowa 3-nji orna mynasyp boldular. Bäsleşigiň ýeňijilerine Ýaşlar guramasynyň ýerli Geňeşiniň Hormat hatlary we ýadygärlik sowgatlary dabaraly ýagdaýda gowşuryldy.
Akjagül AMANOWA,
TMÝG-niň Daşoguz welaýatynyň
Akdepe etrap Geňeşiniň baş hünärmeni.
