Asyrlar boýy agzybirligi tug edinen türkmen halkynyň her bir güni toýly wakalara beslenip gelýär. Gahryman Arkadagymyzyň, Arkadagly Gahryman Serdarymyzyň saýasynda tutýan toýlarymyzyň goşa-goşadan gelmegi asylly däbe öwrüldi. Bu şanly wakalaryň ählisi taryhyň gatlaryna zerlenip ýazylýar.
Ýaňy-ýakynda Pähim-paýhas ummany Magtymguly Pyragy ýylynyň ajaýyp günlerinde Änew şäheriniň «Türki dünýäsiniň medeni paýtagty» diýlip yglan edilmegi mynasybetli dabaralaryň joş alýan pursatlarynda Arkadagly Gahryman Serdarymyzyň döwet galamyndan syzylyp çykan täze «Änew – müňýyllyklardan gözbaş alýan medeniýet» atly ajaýyp kitabyny sowgat bermegi ähli türkmen halkynyň buýsançly başyny göge diredi. Ýeri gelende bellesek, 1904-nji ýylda Amerikan alymy R.Pampelliniň ýolbaşçylygynda Änewde geçirilen gazuw agtaryş işlerinde bugdaý däneleriniň tapylmagy netijesinde bu mesgen ak bugdaýyň Watany diýlip yglan edildi. Bu taryhy wakanyň ýüz ýyllygynyň öňüsyrsynda 2004-nji ýylda döwletimizde «Türkmenistan – Änew medeniýetiniň we ak bugdaýyň Watany» atly halkara ylmy maslahaty geçirildi. Üstümizdäki 2024-nji ýylda taryhy wakanyň 120 ýyllygynyň şanyna «Änew – müňýyllyklardan gözbaş alýan medeniýet» atly kitabyň neşir edilmegi halkymyzyň toý şowhunyny goşalandyran Şa serpaýy boldy. Türkmeniň baý taryhyny şöhratlandyrýan, mertebesini has-da beýgeldýän bu gymmatly eserde mukaddes ahal topragyndaky taryhy mesgen Änew şäheri barada ylmy we çeper gürrüňler giň beýanyny tapýar.
Arkadagly Gahryman Serdarymyzyň bu kitabynyň türkmen, iňlis, rus dillerinde neşir edilmeginde aýratyn many bar. Munuň özi, Gahryman Arkadagymyzyň öňdengörüjilikli syýasaty netijesinde başy başy başlanan üç dillilik syýasatynyň Hormatly Prezidentimiziň parasatly baştutanlygynda mynasyp durmuşa geçirilýändiginiň aýyň beýanydyr. Dünýä dillerinde neşir edilen bu kitap diňe bir türkmen halkynyň däl eýsem, dünýäniň giň okyjylar köpçüliginiň ünsini hem özüne çekdi. Geçmişi yzarlaýan, geljegi nazarlaýan «Änew – müňýyllyklardan gözbaş alýan medeniýet» atly ajaýyp eser dünýä dillerini kämil derejede öwrenýän biz talyp ýaşlara, halkymyzyň baý taryhyny öwrenmekde gymmatly gollanma, ýan kitabymyza öwrüldi.
Hormatly Prezidentimiz kitaby ýazmakda Gahryman Arkadagymyzyň paýhasly pikirleriniň ýakyndan ýardam berendigi barada buýsanç bilen belläp, Gahryman Arkadagymyzyň beren gürrüňlerinden mysallary getirýär. Olaryň birinde: «Ýaş nesiller halkymyzyň taryhy ykbalyndan hem-de onuň ylmy esasda öwrenilişinden hemişe habarly bolmalydyrlar» diýen dürdäne sözler bar. Biz ýaşlar bu zer ýalkymly sözleri şygar edinip, yhlasly okap, döredip, halkymyzyň baý geçmişimizi öwrenmekde alnyp barylýan işlere mynasyp goşandymyzy goşjakdygymyza, şöhratly taryhymyzy dünýä ýaýjakdygymyza tüýs ýürekden ynandyrýarys!
Watanyň geljegini ýaşlarda görýän, bize okamaga, şöhratly taryhymyzy öwrenmäge giň mümkinçilikleri döredip berýän Türkmen Halkynyň Milli Lideri Gahryman Arkadagymyza, peder ýoluny mynasyp dowam edýän Arkadagly Gahryman Serdarymyza köp sagbolsun aýdýarys! Gahryman Arkadagymyzyň, Hormatly Prezidentimiziň janlary sag, ömürleri uzak uzak bolsun, il bähbitli, dünýä ähmiýetli alyp barýan beýik işleri hemişe rowaçlyklara beslensin!
Bibimerýem GELDIMYRADOWA,
Döwletmämmet Azady adyndaky TMDDI-niň
Iňlis dili we edebiýaty fakultetiniň talyby.
