Düýn Türkmen bedewiniň milli baýramy mynasybetli Gahryman Arkadagymyzyň döredijilik zehini esasynda gurlan, Arkadagly Gahryman Serdarymyzyň ak pata bermeginde açylyp ulanylmaga berlen Aba Annaýew adyndaky Halkara atçylyk akademiýasynyň kitaphanasynda «Bir belent ykbal sen illere, bedew!» atly aýdym-sazly brifing duşuşygy geçirildi.
Bu ýerde bilim alýan bagtyýar talyp ýaşlaryň gatnaşmagynda geçirilen duşuşygy Türkmenistanyň Magtymguly adyndaky Ýaşlar guramasynyň Merkezi Geňeşiniň başlygynyň orunbasary Döwletgeldi Durdymuhammedow alyp baryp, onda Halkara ahalteke atçylyk sport toplumynyň seýis-tälimçisi, Türkmenistanyň halk atşynasy Suwhandurdy Kuljanow, «Türkmen atlary» döwlet birleşiginiň Atçylyk ylmy-önümçilik merkeziniň ylmy işgäri Merdan Daýhanow, Aba Annaýew adyndaky Halkara atçylyk akademiýasynyň mugallymy, «Ahalteke atlary – parahatçylygyň ilçileri» atly Ýunesko klubynyň başlygy Atanur Klyşow, Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň guramaçylyk bölüminiň müdiri Umyda Kakaýewa, Aba Annaýew adyndaky Halkara atçylyk akademiýasynyň mugallymy Jennet Seýdiýewa, Aba Annaýew adyndaky Halkara atçylyk akademiýasynyň Atçylygyň weterinariýasy fakultetiniň dekany Daýanç Reýimow hem-de Aba Annaýew adyndaky Halkara atçylyk akademiýasynyň mugallymy, akademiýanyň Ýaş alymlar geňeşiniň başlygy Söýenç Ahmedow dagy çykyş etdiler.
Çykyşlarda Berkarar döwletiň täze eýýamynyň Galkynyşy döwründe türkmen halkynyň Milli Lideri Gahryman Arkadagymyzyň we Arkadagly Gahryman Serdarymyzyň taýsyz tagallalary netijesinde atçylyk pudagyny ösdürmek, türkmen ahalteke bedewlerini ösdürip ýetişdirmekde ýerli şertleriň täsiri, olaryň ylmy esasda öwrenilişi, bu ugurda halkara guramalary bilen alnyp barylýan hyzmatdaşlyklar, şeýle hem milli gymmatlyklarymyzyň ähmiýetini ýokarlandyrmak, ýaşlary bu işlere işjeň çekmek babatynda döredilýän şertler, mümkinçilikler hem-de atçylyk pudagynda ýaşlaryň gazanan üstünlikleri dogrusynda täsirli gürrüňler edildi. Şeýle hem brifing duşuşygyna gatnaşyjy ýaşlar özlerini gyzyklandyrýan sowallar bilen çykyş edýänlere ýüzlenip, kanagatlanarly jogaplary aldylar.
Çäräniň dowamynda ýerine ýetirilen aýdym-sazly çykyşlar bolsa, onuň şowhunlygyny artdyryp, duşuşyga baýramçylyk öwüşgünini çaýdy.
Duşuşygyň barşynda oňa gatnaşyjylaryň akademiýanyň kitaphanasynda Gahryman Arkadagymyzyň, Arkadagly Gahryman Serdarymyzyň ajaýyp kitaplarynyň hem-de ahalteke bedewleriniň şaý-sepleriniň, şeýle hem olaryň surat eserleriniň sergisine aýlanyp görmekleri çäräniň täsirliligini has-da artdyrdy.
Umyda KAKAÝEWA,
TMÝG-niň Arkadag şäheriniň Geňeşiniň bölüm müdiri.
