Ýakynda Türkmen bedewiniň milli baýramy mynasybetli Ahal welaýatynyň Tejen, Babadaýhan, Sarahs etraplarynyň häkimlikleriniň, Türkmenistanyň Magtymguly adyndaky Ýaşlar guramasynyň etrap Geňeşleriniň, etraplaryň beýleki jemgyýetçilik guramalarynyň hem-de medeniýet bölümleriniň bilelikde guramalarynda Sarahs etrabynyň Täze guýy ýaýlasynda joşguna beslenen baýramçylyk dabarasy geçirildi.
Köp sanly bagtyýar ýaşlaryň gatnaşmagynda ýaýbaňlandyrylan dabarada ahalteke atlarynyň şanyna göwünleri joşduryjy aýdym-sazlar ýaňlandy. Bagşy-sazandalaryň ýerine ýetiren şirin owazlary özboluşly gözellikleri özünde jemleýän tebigatyň bu täsin künjegini alaýaza öwürdi. Ähliniň toý şatlygyna şatlyk goşan aýdym-sazly çykyşlar astynda ol ýerde guralan baý öwüşginli sergilere aýlanyp görmek has-da ýakymly we täsirli boldy.
Dabara gatnaşanlar ahalteke bedewleriniň şan-şöhratyny has belende götermekde, ony dünýä ýaýmakda edýän taýsyz tagallalary üçin Gahryman Arkadagymyzyň we Arkadagly Gahryman Serdarymyzyň adyna päk ýürekden çykýan alkyş sözlerini aýtdylar.
Leýli BEGENJOWA,
TMÝG-niň Ahal welaýatynyň Babadaýhan etrap Geňeşiniň
Guramaçylyk bölüminiň sanly ulgam boýunça esasy hünärmeni.
