Ýakynda Ahal welaýatynyň bedenterbiýe we sport baradaky Baş müdirliginiň, Türkmenistanyň Magtymguly adyndaky Ýaşlar guramasynyň Ahal welaýat Geňeşiniň bilelikde guramagynda Arkadag şäheriniň köpugurly sport toplumynda sportuň futzal görnüşi boýunça 2009 — 2011-nji ýyllarda doglan ýetginjekleriň arasynda Ahal welaýatynyň birinjiligini almak ugrunda ýaryş geçirildi.
Ýaryşa toparlaryň bäşisi gatnaşyp, welaýatyň birinjiligini almak ugrunda özara güýç synanyşdylar. Gyzykly duşuşyklaryň netijesinde Ahal welaýatynyň Ýaş olimpiýaçylary taýýarlaýan sport mekdep-internatynyň hem-de Ak bugdaý etrabynyň topary finala çykdylar. Aýgytlaýjy final duşuşygynda Ahal welaýatynyň Ýaş olimpiýaçylary taýýarlaýan sport mekdep-internatynyň topary üstün çykyp, birinji orny eýeledi. Ak bugdaý etrabynyň topary ikinji orna mynasyp boldy. Ýaryşyň ýeňijileri Hormat hatlary we medallar bilen sylaglandy.
Rüstem MUHAMMEDOW,
TMÝG-niň Ahal welaýaty Geňeşiniň başlygynyň orunbasary.
