Berkarar döwletde, bagtyýar zamanada Arkadagly Gahryman Serdarymyzyň saýasynda okamak, ylym öwrenmek, zähmet çekmek, Watanymyzyň ösüşlerine goşant goşmak biz — ýaşlara bagtyýarlykdan nyşandyr. Çünki Berkarar döwletiň täze eýýamynyň Galkynyşy döwründe amala aşyrylýan her bir tutumly başlangyçlarda türkmen halkynyň Milli Lideri Gahryman Arkadagymyz tarapyndan başy başlanyp, Arkadagly Gahryman Serdarymyz tarapyndan mynasyp dowam etdirilýän döwletli tutumlaryň her biriniň gözbaşynda halkymyzyň, aýratyn-da ýaş nesillerimiziň asuda, abadan, parahat durmuşda ýaşamagy baradaky belent maksatlary durýar. Ýaş nesliň ruhy taýdan sagdyn ösmegini, ahlak, edep häsiýetleriniň berkemegini gazanmak, hormatly Prezidentimiziň ýurdumyzda sporty we bedenterbiýäni ösdürmek baradaky alyp barylýan syýasatyny durmuşa ornaşdyrmak ugrundaky işleriň ähmiýeti uludyr. Ýaşlary köpçülikleýin sporta çekmek, sagdyn jemgyýetini kemala getirmek, ussat türgenleri ýüze çykarmak we olaryň halkara ýaryşlaryna gatnaşmagyny gazanmak maksady bilen Dänew etrabynyň 2-nji sport mekdebinde Türkmenistanyň Magtymguly adyndaky Ýaşlar guramasynyň Dänew etrap Geňeşiniň, Türkmenistanyň Demokratik partiýasynyň Dänew etrap komitetiniň, Türkmenistanyň Kärdeşler arkalaşyklarynyň Dänew etrap birleşmesiniň bilelikde guramagynda sport ýaryşlary geçirildi.
Sportuň erkin göreş boýunça 2012—2013-nji ýyllarda doglan oglanlaryň arasynda Dänew etrabynyň açyk birinjiligini almak ugrunda geçirilen bu ýaryşda welaýatymyzyň etrap-şäherleriniň we Mary welaýatynyň sport mekdepleriniň türgenleri öz ussatlyklaryny görkezdiler. Dürli agram derejeler boýunça geçirilen bu sport ýaryşy ussat pälwanlary ýüze çykarmak üçin giň mümkinçilik boldy. Ýaryşyň netijeleri boýunça ýaş pälwanlar Kerim Baýramow, Wepa Ikramow, Alibek Rozybaýew, Selim Mamedow, Ulugbek Ereşow, Nurmuhammet Jumaýew, Azat Allakulyýew, Sultan Setdarow, Alihan Dolyýew, Sylap Hallyýew, Şöhrat Arslanow, Akmuhammet Akyýew, Ruslan Artykow Mahmut Kabulow dagylar öz agram derejelerinde ýeňijiler diýlip yglan edildiler. Ýaryşda baýrakly orny eýelän türgenlere we üstünlikli çykyş eden pälwanlara Türkmenistanyň Magtymguly adyndaky Ýaşlar guramasynyň Lebap welaýatynyň Dänew etrap Geňeşi tarapyndan ýadygärlik sowgatlary we Dänew etrabynyň bedenterbiýe we sport bölüminiň Hormat hatlary dabaraly ýagdaýda gowşuryldy.
Gülbahar BEŞIMOWA,
TMÝG-niň Lebap welaýatynyň Dänew etrap
Geňeşiniň guramaçylyk bölüminiň esasy hünärmeni.
