Ahal welaýatynyň Ak bugdaý etrabynyň Bokurdak şäherçesinde häzirki zamanyň iň kämil okuw enjamlary bilen üpjün edilen 1200 orunlyk täze, döwrebap mekdebiň we 120 orunlyk umumy ýaşaýyş jaýynyň dabaraly ýagdaýda açylyp, ulanylmaga berilmegi Bilimler we talyp ýaşlar güni mynasybetli ýaýbaňlandyrylan şanly wakalaryň ruhubelentligini belende göterdi. Bu dabara Türkmenistanyň Magtymguly adyndaky Ýaşlar guramasynyň Ahal welaýat we etrap Geňeşleriniň işgärleri örän işjeňlikde gatnaşdy.
Täze mekdebiň we umumy ýaşaýyş jaýynyň açylyş dabarasy şatlyk-şowhuna beslendi. Dabaranyň myhmanlary gutlag çykyşlaryny we aýdym-sazlary gyzgyn garşyladylar. Täze binanyň toý bagy kesilenden soňra, hemmeler täze mekdebiň we umumy ýaşaýyş jaýynyň giň amatlyklary bilen tanyşdylar. Döwrebap kompýuterler hem-de beýleki zerur okuw enjamlary bilen üpjün edilen otaglaryň, ýöriteleşdirilen fizika, himiýa, matematika we beýleki dersler boýunça otaglaryň enjamlaşdyrylyşy uly gyzyklanma döretdi. Bu zatlar okuw işlerini netijeli alyp barmaga, ýaş nesle döwrebap bilim bermäge giň şertler mümkinçilik berýär. Mekdepde kitaphana hem-de okuwçylaryň döredijilik zehinlerini özleşdirmekleri üçin niýetlenen saz otaglary bar. Oglanlardyr gyzlaryň zähmet sapagy üçin ajaýyp şertler göz öňüne tutulypdyr.
Täze 1200 orunlyk orta mekdebi, 120 orunlyk umumy ýaşaýyş jaýyny sowgat edendigi biziň welaýatymyzyň ýaşlarynyň türkmen halkynyň Milli Lideri Gahryman Arkadagymyza we hormatly Prezidentimiz Arkadagly Gahryman Serdarymyza alkyşlary çäksizdir. Goý, Gahryman Arkadagymyzyň, Arkadagly Gahryman Serdarymyzyň janlary sag bolsun, tutumly işleri hemişe rowaçlyklara beslensin!
Röwşen MAKSATMYRADOW,
TMÝG-niň Ahal welaýat Geňeşiniň guramaçylyk
bölüminiň sanly ulgam boýunça esasy hünärmeni.
