Köýtendag etrap häkimligi bilen bilelikde Türkmenistanyň Halk Maslahatynyň nobatdaky mejlisini guramaçylykly geçirmek, Garaşsyzlyk baýramyny zähmet üstünlikleri bilen garşylamak ugrunda etrabymyzda alnyp barylýan netijeli we yzygiderli işlere bagyşlap maslahat geçirdik. Oňa Türkmenistanyň Mejlisiniň deputatlary, halk maslahatynyň agzalary, etrabyň edara-guramalarynda zähmet çekýän ýaş hünärmenler gatnaşdylar. Maslahatda edilen çykyşlarda Gahryman Arkadagymyzyň, Arkadagly Gahryman Serdarymyzyň saýasynda ýurdumyzda ykdysadyýetiň ösüşiniň ýokary derejesini üpjün etmäge gönükdirilýän giň maksatnamalaýyn işlerde ýokary netijelere eýe bolunýandygy giňişleýin nygtaldy.
«Pähim-paýhas ummany Magtymguly Pyragy» ýylynda şanly Garaşsyzlygymyzyň 33 ýyllyk baýramynyň öňüsyrasynda geçiriljek Türkmenistanyň Halk Maslahatynyň nobatdaky mejlisini agzybirlikde we guramaçylykly geçirmäge görülýän taýýarlyk işleri, taryhy ähmiýeti, bu ählihalk forumynda kabul edilýän çözgütleriň ýerine ýetirilişi dogrusyndaky çykyşlar ildeşlerimizde uly ruhubelentlik döretdi. Şeýle-de bagtyýar ildeşlerimiz özleriniň çykyşlarynda mukaddes Garaşsyzlygymyzyň şanly toýy mynasybetli welaýatymyzyň senagat kärhanalarynda gaýratyny gaýgyrmaýan hünärmenleriň ýokary zähmet üstünlikleri, önümçilik görkezijileri dogrusynda aýratyn nygtadylar. Çykyşlardan görnüşi ýaly, her bir gününi beýik sepgitler, ýokary görkezijiler bilen jemleýän raýatlarymyzyň yhlasly zähmeti we batly gadamlary geljekde-de ýurdumyzyň okgunly ösüşini üpjün eder.
Maslahata gatnaşyjylar nurana şu günümiz, parahat geljegimiz ugrunda taýsyz aladalary durmuşa geçirýän Gahryman Arkadagymyzyň we peder ýoluny mynasyp dowam etdirýän Arkadagly Gahryman Serdarymyzyň janlarynyň sag, ömürleriniň uzak, il-ýurt bähbitli tutumly işleriniň hemişe rowaç bolmagyny arzuw etdiler.
Göwher MÖWLÝAMOWA,
TMÝG-niň Lebap welaýatynyň
Köýtendag etrap Geňeşiniň esasy hünärmeni.
