15-nji sentýabrda Awazada «Amul — Hazar 2018» halkara awtorallisi üstünlikli tamamlandy. Şol gün agşam «Awaza» milli syýahatçylyk zolagynda awtomobil sportunyň ýyl ýazgysyna giren awtomobil ýaryşyna gatnaşyjylaryň duşuşygynyň dabaraly çäresi geçirildi.
Ralliniň ýeňijilerine baýraklary gowşurmak dabarasy Balkan welaýatynyň baş baýdak sütüni oturdylan meýdanda geçirildi.
Dabarany alyp baryjy sürüjileriň atlaryny, olaryň toparlaryny we ýurtlaryny yglan etdi. Her toparda ýeňiş gazananlar we baýrakly orunlara eýe bolanlar hormat münberinde öz orunlaryny eýelediler hem-de «Amul — Hazar 2018» ýazgyly baýraklary alyp, olary ýokary galdyryp, ýygnananlara görkezdiler.
Taryhy Beýik Ýüpek ýolunyň ugry boýunça geçirilen «Amul — Hazar 2018» awtomobil ýaryşy öz gerimi hem-de ähmiýeti boýunça Aziýada ýolsuz ýerlerden geçmek babatda uly ýaryşlara öwrüldi. Ägirt uly sport ýaryşy 20-den gowrak ýurtlardan — Fransiýadan, Ispaniýadan, Saud Arabystanyndan, Çehiýadan, Beýik Britaniýadan we beýleki ýurtlardan sportuň özüne çekiji görnüşleriniň biriniň ussatlaryny we höwesjeňlerini birleşdirdi.
Bu ýaryşda Türkmenistandan dürli toparlarda ekipažlaryň 15-si çykyş etdi. Hünärmenleriň baha bermegine görä, ýaş türkmen toparynyň agzalary oňat netijeleri görkezdiler hem-de ynam bilen ýeňiş ugrunda bäsleşdiler.
Islendik ýaryşda bolşy ýaly, biziň ýurdumyzda geçen rallide hem bäsdeşlik, göreş, ýokary ussatlyk ruhy ýüze çykdy. Ýöne, ilkinji nobatda, munuň özi dünýäde parahatçylygyň bähbidine adamlary birleşdirýän we jebisleşdirýän sport baýramçylygy boldy.
Ýaryşa gatnaşyjylar täze döwrüň ruhuna aralaşyp, Türkmenistanda ýaýbaňlandyrylan ägirt uly özgertmeleri, ýurdumyzyň ähli sebitlerine düýpli durmuş-ykdysady özgertmeler, ylmy-tehniki gazanylanlary ornaşdyrmak we senagat ösüşi bilen bilelikde gelýän özgerişlikleri öz gözleri bilen görmäge mümkinçilik aldylar.
Şol günki dabaralar agşamara «Awaza» milli syýahatçylyk zolagynyň çüwdürimler seýilgähinde dowam etdi. Ol ýerde awtorallini guraýjylar we oňa gatnaşyjylar, şeýle hem ýurdumyzyň medeniýet işgärleri we sungat ussatlary ýygnandylar hem-de «Türkmeniň Altyn asyry» bäsleşiginiň ýeňijileriniň sylaglary gowşuryldy we hormatly atlar dakyldy.
Döwlet Baştutanymyz ýygnananlara gutlag sözleri bilen ýüzlendi. Şu ýylyň ýurdumyzda «Türkmenistan — Beýik Ýüpek ýolunyň ýüregi» diýen şygar astynda geçýändigini bellemek bilen, milli Liderimiz geçirilýän çäreleriň çuňňur many-mazmunyny we taryhy ähmiýetini belledi.
Halkara rallisine gatnaşan türgenler Amuldan başlap, bütin türkmen sährasynyň gözel ýerleriniň üsti bilen geçip, Hazar deňziniň kenaryna gelip ýetdiler. Şu gün hem welosiped, ylgaw we awtomobil ýaryşynyň jemi jemlendi diýip, döwlet Baştutanymyz belledi.
Türkmeniň toýlary goşa-goşadan gelýär diýleni. Biz şu gün «Türkmeniň Altyn asyry» bäsleşiginiň ýeňijilerini sylagladyk. Medeniýet we sungat işgärlerimiziň birnäçesine hormatly atlary dakdyk diýip, hormatly Prezidentimiz sözüni dowam etdi.
Medeniýet biziň taryhymyz bilen aýrylmaz baglydyr. Geçmişde adamlary şunuň ýaly medeniýet birleşdirýärdi diýip, milli Liderimiz aýtdy hem-de medeniýet we sungat işgärlerini mynasyp bolan sylaglary hem-de hormatly atlary bilen tüýs ýürekden gutlap, olara mundan beýläk hem täze döredijilik üstünliklerini arzuw etdi!
Ýurdumyzyň halkara sport abraýy hem yzygiderli ýokarlanýar. Häzir Garaşsyz, hemişelik Bitarap Türkmenistan sport döwleti hökmünde dünýäde giňden tanalýar.
Hormatly Prezidentimiz ýaryşa gatnaşyjylary hem-de ýeňijileri bu ýaryşyň Beýik Ýüpek ýolunyň ugry boýunça Garagum sährasynyň gözel künjeklerinden geçip, «Awaza» milli syýahatçylyk zolagynda tamamlanmagy bilen tüýs ýürekden gutlap, hemmelere sportda uly üstünlikleri arzuw etdi.
Soňra «Afrika Eko Reýs» ralli ýaryşynyň Baş direktory Žan-Lui Şlessere söz berildi. Ol ilki bilen dünýäniň bagtyýar künjegi bolan Awazanyň gözelligini we umuman, Türkmenistanda bildirilen mähirli we şatlykly myhmansöýerligi belledi. Ajaýyp, gaýtalanmajak tebigat, ýaryşa gatnaşyjylaryň ýollarynyň ugrunda gurnalan üýtgeşik düşelgeler — bularyň ählisi beýik medeniýetiň ýüze çykmasydyr diýip, myhman aýtdy.
Ol şeýle hem döwlet Baştutanymyza hem-de dört görnüşde çykyş eden we baýrakly orunlary eýelän, ýaryşda iň köp sanly topar bolan Türkmenistanyň ýygyndysyna hoşallyk bildirdi.
...Soňra Akhan diýen ahalteke bedewiniň Ginnesiň rekordlar kitabyna girizilendigi hakynda şahadatnamanyň gowşurylyş dabarasy boldy.
Ginnesiň rekordlar kitabynyň resmi wekili hem-de emin Şeýda Subaşi-Gemijiniň sahna çykyp belleýşi ýaly, ozalky rekord 9,21 sekund netije bilen Dubaýda goýuldy. Ýöne, Akhan bu netijäni ep-esli gowlap, türkmen seýisleri we atşynaslary tarapyndan ençeme ýüzýyllyklaryň dowamynda ösdürilip ýetişdirilen ahalteke bedewleriniň gaýtalanmajak gymmatlygyny ynamly görkezdi.
Bu ýere ýygnananlaryň el çarpyşmalary bilen «Guinness World Records»-yň adyndan bu ajaýyp görkezijiniň resmi taýdan ykrar edilmegi barada sertifikat gowşuryldy.
Hormatly Prezidentimiz Gurbanguly Berdimuhamedow hem-de «Afrika Eko Reýs» ralli ýaryşynyň ýolbaşçysy Žan-Lui Şlesser sahna çagyryldy.
Olar bilelikde ýaryşyň ýeňijilerine ýörite baýraklary we «Amul — Hazar 2018» ýadygärlik teňňeleriň toplumyny hem-de sowgatlyk türkmen milli lybaslary — içmekleri we silkme telpekleri gowşurdylar. Şeýlelikde, altyn baýragyň eýeleri: özleriniň «MINI» awtoulagynda ýoly hemmelerden tiz geçen ispanlylar Hoan Roma we Aleks Haro, Belarusuň «MAZ» topary — sürüjisi Sergeý Wýazowiç, şturmany Pawel Garanin hem-de mehanigi Andreý Žigulin, Gazagystandan «NISSAN» awtoulagynyň topary Kirill Çernenkow we Alekseý Mun, Fransuz toparlary Týerri Pitawi we Jillis Kolombe, Iwan-Pýerre we Weronika Dard dagy boldular.
Kümüş baýraklara: Çehiýadan Miroslaw Zapletal we Marek Sikora, Russiýadan «kamazyň» sürüjileri Aýrat Mardeýew, Dmitriý Swistunow we Ahmet Gilýautdinow, fransuz jübüti Herwe Dirs we Alan Brýus, gazagystanlylar Marat we Nursultan Abikaýewler, britaniýaly sürüji Garri Hant öz şturmany Wouter Rozegaar mynasyp boldular.
Hormat münberiniň üçünji basgançagyna, türkmen toparlarynyň ikisi: sürüji Hojaguly Annamämmedow — Türkmenistanyň Prezidentiniň Diwanynyň awtoulag kärhanasynyň sürüjisi, Türkmenistanyň Içeri işler ministrliginiň Sport-ulag merkeziniň türgeni hem-de şturman Gaýgysyz Akmyradow — Türkmenistanyň Goranmak ministrliginiň awtoulag müdirliginiň serkerdesi, şeýle hem sürüji Guwanç Hommadow, Türkmenistanyň IIM-niň Sport-ulag merkeziniň türgeni hem-de şturman Rejepnyýaz Annaberdiýew çykdylar.
Bürünç baýrak eýeleriniň arasynda şeýle hem «KAMAZ-masteriň» wekilleri Dmitriý Sotnikow, Ruslan Ahmadeýew, Ilgiz Ahmetzýanow, fransuzlar Žan-Klod Rufýe we Jerom Bos, gollandlar Gert Žan Wan Der Walk hem-de Branko da Lange bar.
Sylaglary kabul etmek bilen, ýeňijiler ajaýyp ýurt bolan Türkmenistana gelmek we ençeme asyrlary başdan geçiren hem-de geljege ymtylýan Beýik Ýüpek ýolunyň gaýtadan dikeldilmegi babatda, hakykatdan-da, taryhy ähmiýete eýe bolan ähmiýeti boýunça deňsiz-taýsyz awtomobil ýaryşyna gatnaşmak mümkinçiligi üçin tüýs ýürekden hoşallyk bildirdiler.
Sowgatlyk lybaslaryny alanlaryň her biri olary geýip, ýadygärlik surata düşdüler. Soňra Žan-Lui Şlesser ýolbaşçylyk edýän guramasynyň adyndan we hut öz adyndan ralliniň guralmagynda we geçirilmeginde uly goldawy we gatnaşandygy üçin, ýeňijilere gowşurylan Türkmenistan barada ýakymly we ýagşy ýatlamalar bolup galjak ajaýyp sowgatlar üçin Türkmenistanyň Baştutanyna hoşallyk sözleri bilen ýüzlendi.
Ýöne, ol ralliniň hakyky ýeňijisiniň hormatly Prezidentimiz Gurbanguly Berdimuhamedowdygyny aýtdy hem-de milli Liderimize «Amul — Hazar 2018» rallisiniň hakyky ýeňijisi hökmünde «Africa Eco Race»-iň adyndan ýörite sylagy gowşurdy.
Soňra baýramçylyk konserti boldy. Onda türkmen we daşary ýurt estrada artistleri, ýurdumyzyň meşhur tans we halk döredijilik toparlary çykyş etdiler. Tomaşaçylar hormatly Prezidentimiz Gurbanguly Berdimuhamedowyň sözlerine «Sportly Türkmenistan» diýen aýdymy şatlykly garşyladylar. Aýdymyň sazy milli Liderimiziň agtygy Kerimgula degişli bolup, ony «Güneş» topary bilen bilelikde ýerine ýetirdi.
Konsertiň ahyrynda milli Liderimiz Gurbanguly Berdimuhamedowyň ýazan «Öňe, öňe, diňe öňe, jan Watanym Türkmenistan!» atly aýdym ýaňlanyp, onuň sözlerini konserte gatnaşyjylar agzybirlikde alyp göterdiler.
Soňra hormatly Prezidentimiz «Amul — Hazar 2018» halkara awtorallisiniň jemlenmegine bagyşlanan dabara gatnaşyjylar bilen mähirli hoşlaşyp, bu ýerden ugrady.
Uly feýerwerk dabaranyň jemlenmesine öwrüldi. Ol Hazaryň kenarýaka asmanyny müň dürli öwüşginler bilen bezedi.
(TDH-niň maglumatlary esasynda taýýarlanyldy).
“Nesil” gazeti,
18.09.2018ý.
