Garaşsyz, hemişelik Bitarap Türkmenistanyň halkara gatnaşyklarynda, syýasatda, ykdysadyýetde, ulag-aragatnaşyk pudaklarynda we beýleki ulgamlarda gazanýan ösüşleri dünýä nusgalykdyr. Ýurdumyzyň giň gerimli halkara hyzmatdaşlygyny durmuşa geçirmegi, sebitde ykdysady ähmiýetli taslamalara işjeň gatnaşmagy, dünýä döwletleri we abraýly halkara guramalary bilen netijeli gatnaşyklary ýola goýmagy, dünýä tejribesini toplamagy eziz Diýarymyzyň ösmegine, özgermegine uly itergi berdi.
Bu günki gün Türkmenistan köp sanly abraýly halkara we sebit guramalary bilen netijeli hyzmatdaşlygy alyp barýar. Ýurdumyz Birleşen Milletler Guramasynyň, Ýewropa Bileleşiginiň, Ýewropada Howpsuzlyk we Hyzmatdaşlyk Guramasynyň, Garaşsyz Döwletleriň Arkalaşygynyň we beýleki halkara düzümleriň durmuşa geçirýän ynsanperwer maksatnamalaryny we taslamalaryny goldaýar.
Birleşen Milletler Guramasynyň Bilim, ylym we medeniýet meseleleri boýunça ýöriteleşdirilen edarasy bolan ÝUNESKO bilen alnyp barylýan işjeň hyzmatdaşlyk aýratyn ähmiýete eýedir. Bu gurama bilen hyzmatdaşlygyň çäklerinde bilim, ylym we medeniýet ulgamynda uly işler durmuşa geçirilýär. Ýurdumyz ÝUNESKO-nyň medeni ýadygärlikleriň we tebigy landşaftlaryň gorap saklanylmagy, dikeldilmegi ugrunda tagallalaryna hem saldamly goşant goşýar.
Umumadamzat gymmatlyklaryna we gazananlaryna hormat goýmak, olary dürli täsirlerden goramak ýaly wajyp wezipeleri durmuşa geçirýän bu guramanyň ýurdumyzyň çäginde taryhy we medeni ähmiýetli 1000-den gowrak ýadygärlikleri ýüze çykaryp, hasaba almagy hyzmatdaşlygyň has-da işjeňleşjekdigini görkezýär.
Baýramgül ESENOWA,
Türkmenistanyň Magtymguly adyndaky Ýaşlar guramasynyň
“Türkmennebit” D/K-niň şahamçasynyň Guramaçylyk bölüminiň müdiri.
