Hormatly Prezidentimiziň taýsyz tagallalary netijesinde ýurdumyzyň ýaşlary dost-doganlygyň we ikitaraplaýyn bähbitli gatnaşyklarynyň hatyrasyna daşary döwletlerde hem-de güneşli ýurdumyzyň çäginde geçirilýän dürli ugurlardaky duşuşyklara, maslahatlara, sammitlere, seminarlara we forumlara işjeň gatnaşmaklary üçin giň mümkinçilikler döredilýär. Şeýle mümkinçilikleriň netijesinde Magtymguly adyndaky Ýaşlar guramasynyň işgärleriniň Gazagystan, Gyrgyzystan we Özbegistan Respublikalarynda geçirilen halkara sammitlere, seminarlara we forumlara gatnaşmaklaryny mysal getirip bolar. Ýaşlar syýasaty bilen bagly geçirilýän halkara duşuşyklarynda täsin we gyzykly maglumatlar bilen tanyşmakda, dünýä döwletleriniň ýaşlary bilen ylym, bilim, telekeçilik, medeniýet we sport ulgamlarynda özara tejribe alyşmakda, şeýle-de hormatly Prezidentimiziň parasatly ýolbaşçylygynda ýurdumyzyň ýaşlar syýasatyny üstünlikli durmuşa ornaşdyrmakda alnyp barylýan işler bilen giňden tanyşdyrmaga bu geçirilýän halkara duşuşyklaryň ähmiýeti uludyr.
Türkmenistan Merkezi Aziýa sebitiniň döwletleri bilen dürli ulgamlarda hyzmatdaşlygy ösdürmek bilen bir hatarda, sebitde ýaşlaryň sazlaşykly ösmegi we özara bähbitli hyzmatdaşlyklary pugtalandyrmak ugrunda ähli mümkinçilikleri döredýär. 2018-nji ýylyň aprel aýynyň 23-24-i aralygynda hormatly Prezidentimiziň Özbegistan Respublikasyna amala aşyran döwlet saparynyň dowamynda Türkmenistanyň Magtymguly adyndaky Ýaşlar guramasynyň Merkezi Geňeşiniň we Özbegistan Respublikasynyň Ýaşlar birleşiginiň Merkezi Geňeşiniň arasynda ikitaraplaýyn Özara düşünişmek Ähtnamasynyň kabul edilmegi bu taraplaryň özara bähbitli hyzmatdaşlygyny ösdürmekde, şeýle-de türkmen-özbek ýaşlarynyň arasynda dost-doganlyk gatnaşyklaryny pugtalandyrmakda hem-de iki döwletiň ýaşlarynyň arasynda köptaraplaýyn gatnaşyklaryň ösmegini üpjün etmekde örän möhüm wakalaryň biri boldy.
Iýun aýynyň 28-30-y aralygynda Özbegistanyň Samarkant şäherinde ilkinji gezek geçirilen Merkezi Aziýanyň ýaşlarynyň maslahatyna hem gatnaşyldy. Onda sebitiň umumy mümkinçilikleriniň ösüşinde ýaşlaryň orny, ýaşlar guramalarynyň we edaralarynyň özara hyzmatdaşlygynyň amaly ugry boýunça maslahatlaşyldy.
Bagtyýar Diýarymyzyň halkara abraýyny belent derejelere ýetirýändigi hem-de biz — ýaşlaryň dünýä döwletleriniň ýaşlary bilen duşuşyp, pikir alyşmak üçin döredip berýän ajaýyp mümkinçilikleri üçin hormatly Prezidentimize köp sagbolsun aýdýarys!
Berdimyrat ÇARYÝEW,
TMÝG-niň Merkezi Geňeşiniň bölüm müdiri.
“Nesil” gazeti,
14.07.2018ý.
