Ýakynda Aşgabat şäherindäki 80-nji orta mekdepde Türkmenistanyň Magtymguly adyndaky Ýaşlar guramasynyň Merkezi Geňeşiniň Türkmenistanyň Bilim ministrligi bilen bilelikde guramagynda ýurdumyzyň umumybilim berýän orta mekdepleriniň 2-4-nji synplarynda okaýan okuwçy gyzlarynyň arasynda yglan edilen «Iň eýjejik gyzjagaz — 2020» atly bäsleşigiň Berkararlyk etrap tapgyry geçirildi. Bäsleşigiň bu tapgyryna etrabyň çägindäki orta mekdeplerde bilim alýan gyzjagazlar gatnaşyp, hormatly Prezidentimiziň baştutanlygynda alnyp barylýan işleri, ata Watanymyzy, bagtyýar çagalygy wasp edýän aýdym-sazly çykyşlary ýerine ýetirmek, milli egin-eşikleri geýip, olary şahyrana wasp etmek hem-de çeper okaýyş boýunça özara ýaryşdylar. Ýeňijilere Berkararlyk etrap Ýaşlar guramasy tarapyndan Hormat hatlarydyr ýadygärlik sowgatlary dabaraly ýagdaýda gowşuryldy.
Aýnagözel ANNANUROWA,
TMÝG-niň Berkararlyk etrap Geňeşiniň hünärmeni.
«Gözellik edebi, ahlak arassalygy, edeplilik, terbiýelilik, salyhatlylyk, utanç-haýalylyk» ady bilen Ruhubelent etrabynda etrap häkimliginiň, etrap polisiýa bölüminiň, etrap Ýaşlar guramasynyň, etrap bilim bölüminiň hem-de etrap hassahanasynyň bilelikde guramagynda mekdep okuwçylarynyň arasynda wagyz-nesihat duşuşygy geçirildi. Onda Gahryman Arkadagymyzyň beden we ruhy taýdan sagdyn nesli kemala getirmekdäki aladalary, ýaşlary watançylyk ruhunda terbiýelemek, ata-babalarymyzyň ýol-ýörelgelerini, ahlak arassalygyny wagyz etmek bilen baglanyşykly çykyşlar edildi. Şeýle hem kämil sypatlary özünde jemleýän ýaşlary kemala getirmekde hormatly Prezidentimiziň kitaplarynyň terbiýeçilik ähmiýeti barada durlup geçildi. Çykyş edenler ýaşlaryň hormatly Prezidentimiziň ynamyny ödäp, Watanymyza, halkymyza wepaly şahsyýetler bolup ýetişjekdiklerine ynam bildirdiler.
Laçyn ARAZOWA,
TMÝG-niň Ruhubelent etrap Geňeşiniň başlygy.
Ak bugdaý etrabynyň Gämi Medeniýet öýünde Türkmenistanyň Mejlisiniň iki palataly ulgama geçmegine hem-de 2020-nji «Türkmenistan — Bitaraplygyň mekany» ýylyna bagyşlanyp «Bitaraplyk — parahatçylygyň binýady» atly wagyz-nesihat duşuşygy geçirildi. Ak bugdaý etrap häkimligi, etrap prokuraturasy we etrap Ýaşlar guramasy tarapyndan guralan duşuşyga Mejlisiň deputatlary, TDP-niň, TMÝG-niň wekilleri, il sylagly ýaşulular, etrap prokuraturasynyň, etrabyň bilim hem-de medeniýet ulgamynyň işgärleri, mekdep okuwçylary gatnaşdylar. Çykyş edenler hormatly Prezidentimiziň saýasynda durmuşa geçirilýän syýasy özgertmeler, ýurdumyzyň oňyn bitaraplyk ýörelgelerine berk eýermek arkaly dünýäde hem-de sebitde parahatçylygy, durnuklylygy pugtalandyrmakdaky orny barada durup geçdiler. Wagyz-nesihat duşuşygynyň ahyrynda oňa gatnaşanlar Gahryman Arkadagymyza alkyşly sözleri aýtdylar.
Maksat BALLYKOW,
TMÝG-niň Ak bugdaý etrap Geňeşiniň başlygy.
Golaýda Balkan welaýat we Balkanabat şäher Ýaşlar guramasynyň «Türkmennebit» döwlet konserniniň Balkanabat nebitçilik orta hünär okuw mekdebi bilen bilelikde guramagynda bu mekdebiň mejlisler otagynda talyplaryň arasynda wagyz-nesihat duşuşygy geçirildi. «Döwletli tutumlar — Berkararlygyň binýady» ady bilen geçirilen duşuşykda ýurdumyzda amala aşyrylýan konstitusion özgertmelere bagyşlanan çykyşlara orun berildi. Balkan welaýatynyň we Balkanabat şäher Ýaşlar guramalarynyň wekilleriniň hem-de Balkanabat nebitçilik orta hünär okuw mekdebiniň mugallymlary eziz Diýarymyzda adam hukuklarynyň goraglylygy, demokratiýanyň dabaralanmagy, milli kanunçylyk binýadynyň berkidilmegi ugrunda hormatly Prezidentimiziň atalyk aladalary dogrusynda durup geçdiler.
Güljemal MAÝJANOWA,
TMÝG-niň Balkan welaýat Geňeşiniň bölüm müdiri.
Türkmenistanyň Magtymguly adyndaky Ýaşlar guramasynyň Merkezi Geňeşiniň we Türkmenistanyň Bilim ministrliginiň bilelikde guramagynda ýurdumyzyň umumybilim berýän orta mekdepleriniň 2-4-nji synp okuwçy gyzjagazlarynyň arasynda yglan eden «Iň eýjejik gyzjagaz — 2020» atly bäsleşik şatlyk-şowhuna beslenip dowam edýär. Ýakynda bäsleşigiň Mary şäher tapgyry geçirildi. Oňa Mary şäherindäki «Joşgun» çagalar we ýetginjekler döredijilik öýünden, Mary welaýatynyň Taryhy we ülkäni öwreniş muzeýinden, welaýat Medeniýet müdirliginden, welaýat halk döredijilik merkezinden hem-de TMÝG-den wekiller gatnaşdylar. Bäsleşikde öňdäki orunlara mynasyp bolan gyzjagazlar bäsleşigiň welaýat tapgyryna gatnaşmaga hukuk gazandylar we Mary şäher Ýaşlar guramasynyň Hormat hatlarydyr sowgatlary bilen sylaglandylar. Şeýle bäsleşikleriň dowamly geçirilip durulmagy hormatly Prezidentimiziň ösüp gelýän ýaş nesilleriň döredijilik ukyplaryny açmak we bilimlerini çuňlaşdyrmak babatda atalyk aladalarynyň subutnamasydyr.
Annagözel SARYÝEWA,
TMÝG-niň Mary şäher Geňeşiniň bölüm müdiri.
Kerki etrabynyň Taryhy we ülkäni öwreniş muzeýinde «Dünýäniň bar görki enedir, ene» atly serginiň açylyş dabarasy mynasybetli etrabyň 2-nji orta mekdebiniň ýokary synp okuwçylarynyň arasynda gezelenç guraldy. Gezelenje Türkmenistanyň Agrar partiýasynyň Kerki etrap komitetiniň hünärmenleri hem gatnaşdylar. Muzeýiň ylmy işgärleri okuwçylary sergide ýerleşdirilen eksponatlar hem-de olaryň taryhy, aňladýan manylary bilen tanyşdyrdylar. Gezelenç okuwçylarda uly gyzyklanma döretdi. Çäräniň ahyrynda oňa gatnaşyjylar ýurdumyzyň baý medeniýetini öwrenmäge, wagyz etmäge, ýaşlarda milli sungatymyza, däp-dessurlarymyza, ata-babalarymyzyň ýol-ýörelgelerine bolan söýgini terbiýelemekde we watançy ýaşlary kemala getirmäge ajaýyp mümkinçilikleri döredip berýän hormatly Prezidentimize alkyşly sözleri aýdyp, janynyň sag, ömrüniň uzak bolmagyny arzuw etdiler.
Oýdin AŞIROWA,
TMÝG-niň Kerki etrap Geňeşiniň hünärmeni.
“Nesil” gazeti,
29.02.2020ý.
