Çagalary goramagyň halkara güni mynasybetli guralan baýramçylyk çäreleri Türkmenabat şäherinde hem giň gerim aldy. Welaýat merkeziniň «Bitaraplyk» seýilgähi dabaralaryň geçirilýän esasy ýerine öwrüldi. Türkmenistanyň Magtymguly adyndaky Ýaşlar guramasynyň Lebap welaýat we Türkmenabat şäher Geňeşleriniň, Lebap welaýat Baş bilim müdirligi bilen bilelikde guramagynda «Çagalar biziň geljegimizdir» diýen at bilen geçirilen bu baýramçylyk çäresine welaýatyň körpeleri we olaryň ene-atalary, terbiýeçiler, medeniýet we sungat işgärleri, kitaphana we teatr işgärleri gatnaşdylar.
Baýramçylyk çäresinde aýdym-sazly çykyşlara giň orun berildi. Welaýatyň medeniýet we sungat ussatlary şadyýan çagalyga bagyşlanan baýramçylyk çykyşlaryny körpelere sowgat etdiler. Soňra körpeler özleriniň taýýarlan goşgulary, aýdym-tanslary, gyzykly sahna oýunlary bilen myhmanlaryň baýramçylyk ruhlaryny goşalandyrdylar. Olaryň çykyşlarynda Berkarar döwletiň täze eýýamynyň Galkynyşy döwri, bagtyýar çagalygyň waspy edildi. Kitaphana işgärleri hem gyzykly ertekileri, degişme sahnalary bilen çagalary gutladylar. Çagalaryň arasynda guralan sport ýaryşlary çäräniň baýramçylyk şowhunyny artdyrdy. Çäräniň ahyrynda körpelere dabaraly ýagdaýda süýji-kökelerden taýýarlanan baýramçylyk sowgatlary gowşuryldy.
Ýusup BABAKULOW,
Türkmenistanyň Magtymguly adyndaky
Ýaşlar guramasynyň Türkmenabat şäher
Geňeşiniň başlygy.
