Tomus paslynyň ilkinji günlerinde Ahal welaýat häkimliginiň garamagyndaky çagalar dynç alyş-sagaldyş merkezleri mekdep okuwçylaryna gapylaryny giňden açdy. Mekdep okuwçylaryny merkezlere ugratmak mynasybetli welaýat häkimliginiň, Türkmenistanyň Magtymguly adyndaky Ýaşlar guramasynyň welaýat Geňeşiniň hem-de welaýat Baş bilim müdirliginiň guramagynda geçirilen dabaralar ýatda galyjy boldy.
Änew şäheriniň hem-de Kaka etrabynyň Medeniýet öýleriniň öňündäki meýdançalarda ýaýbaňlandyrylan dabaralar mekdep okuwçylaryny degişlilikde Kaka etrabynyň Hywaabat jülgesindäki «Ýaşyl ýaýla» çagalar dynç alyş-sagaldyş merkezlerine ugratmagynyň şanyna ýaýbaňlandyrylyp, olarda aýdym-sazly çykyşlara giň orun berildi. Ýaş nesliň sungat çykyşlarynda güneşli Watanymyzyň, beýik döwrümiziň, asuda durmuşymyzyň, bagtyýar çagalygyň waspy eriş-argaç bolup geçdi.
Belent ruha beslenen dabaralar tamamlanandan soňra, bagtdan paýly çagalar özlerine garaşyp duran ýokary amatlykly awtobuslara münüp, Gökderä we Hywaabat jülgesine sary ýola düşdiler. Olar dag jülgesiniň ajaýyplygyna gözellik goşýan kaşaň merkezlerde aýdym-sazly çykyşlar astynda uly ruhubelentlik ýagdaýynda garşylandy. Şeýlelikde, salkyn saýaly merkezlerde mekdep okuwçylarynyň tomusky dynç alyş möwsüminiň birinji tapgyry başlandy. Bu tapgyrda bagtyýarlyk mekany bolan çagalar dynç alyş-sagaldyş merkezlerde welaýatyň dürli künjeklerinden gelen çagalaryň ýüzlerçesi dynç alyp, saglygyny berkider.
Merdanaly ORAZBERDIÝEW,
TMÝG-niň Ahal welaýat Geňeşiniň başlygy.
