Türkmenistanyň Magtymguly adyndaky Ýaşlar guramasynyň Balkan welaýatynyň Esenguly etrap Geňeşi, etrap Bilim bölümi bilen bilelikde Esenguly etrap medeniýet merkeziniň tomaşaçylar zalynda Halkara Bitaraplyk güni hem-de Birleşen Milletler Guramasynyň Baş Assambleýasy tarapyndan Türkmenistanyň Hemişelik Bitaraplyk derejesiniň ykrar edilmeginiň 28 ýyllygy mynasybetli ýurdymyzyň umumybilim berýän orta mekdepleriniň 3-5-nji synplarynda okaýan okuwçy oglanlaryň arasynda her ýylda geçirýän «Merdana nesil - 2023» atly şadyýan bäsleşiginiň etrap tapgyryny geçirdi. Bäsleşige etrabymyzyň orta mekdeplerinden ýeňiji bolan oglanjyklaryň birnäçe gatnaşyp, uly ruhubelentlik bilen çykyş etdiler. Bäsleşikde esasan kiçi ýaşly oglanjyklaryñ merdana ata-babalarymyzyň asyrlar boýy dowam edip gelýän asylly däplerine, merdanalygyna uýmak, ýaşlaryñ arasynda tertip-düzgüni, dost-doganlygy berkitmek, ula-kiçä sylag-hormaty terbiýelemek, kesp, kär, hünär öwrenmeklige höwes döretmek ýaly watançylyk maksatlaryny göz öñünde tutuldy.
Bäsleşik tamamlanyp, emin agzalarynyñ gelen netijesi boýunça etrabyň 10-njy orta mekdebiniň 4-nji synp okuwçysy Serdarmämmet Salyhmämmedow 1-nji orna, 1-nji orta mekdebiniň 5-nji synp okuwçysy Guwançmyrat Baýrammyradow 2-nji orna, 5-nji orta mekdebiniň 5-nji synp okuwçysy Musdafa Mämmedow 3-nji orna mynasyp boldular. Bäsleşikde I-II orna mynasyp bolan oglanjyklar bäsleşigiň welaýat tapgyryna gatnaşmaga hukuk gazandylar. Bäsleşigiň ýeňijilerine, gatnaşan ähli oglanjyklara Türkmenistanyň Magtymguly adyndaky Ýaşlar guramasynyň Esenguly etrap Geňeşi tarapyndan Hormat hatlary hem-de gymmat bahaly ýadygärlik sowgatlary dabaraly ýagdaýda gowşuryldy.
Tagandurdy Tagandurdyýew,
TMÝG-niñ Esenguly etrap Geňeşiniň başlygy.
