Malaýziýanyň paýtagty Kuala-Lumpur şäherindäki Aziýa Futbol Konfederasiýasynyň binasynda geçirilen bije çekişligiň netijesinde, AFK-nyň Çagyryş ligasynda Türkmenistanyň «Altyn asyr» toparynyň garşydaşlary Omanyň «Al-Şabab», Butanyň «Paro» hem-de Gyrgyzystanyň «Abdyş-Ata» futbol toparlary boldular.
Aziýanyň iň möhüm erkekleriň toparlarynyň arasynda geçirilýän üçünji derejeli ýaryşynyň geçen ýyl täzelenen görnüşindäki täze möwsümi ikinji gezek guralar. Bu ýaryşa geografik taýdan iki zolakda – Günbatar we Gündogar sebitlerine bölünen 20 topar gatnaşýar. AFK-nyň Çagyryş ligasy toparlaryň toparçalaýyn tapgyryna gatnaşmagy üçin her birine 100 müň ABŞ dollary möçberinde sylag berilýän bu ýaryş, yklymyň ösýän ligalaryndan bolan toparlaryň ösüşini höweslendirmäge hem-de olaryň jemgyýetçilige görkezmäge gönükdirilendir.
Belläp geçmeli zatlaryň biri hem, «Altyn asyr» futbol toparynyň bije çekişliginden öň birinji sebetde ýerleşmegidir. Bu sebetde Omanyň «Al-Sib» hem-de Täjigistanyň «Regar-TadAZ» toparlary bilen bilelikde ýerleşen Türkmenistanyň 2024-nji ýylyň çempionatynyň bürünç medalynyň eýesi, toparçalaýyn tapgyrda bu toparlar bilen duşuşmak mümkinçiliginden mahrum boldy.
«Altyn asyr» toparynyň öňünde durýan garşydaşlary barada birnäçe söz.
2003-nji ýylda esaslandyrylan we Bark şäherinde ýerleşýän «Al-Şabab» futbol topary Oman döwletiniň ýokary derejeli futbol ligasy bolan Oman ýokary ligasynyň tejribeli toparlarynyň biri hökmünde tanalýar. Geçen möwsüminde bu topar milli ligada 6-njy orny eýeläp, erkekleriň toparlarynyň arasynda geçirilýän ýurduň esasy ýaryşlarynyň biri hasaplanýan, Patyşa Kabusyň adyny göterýän Patyşanyň kubogyny gazandy. Bu üstünlik «Al-Şabab» toparyna Aziýa Futbol Konfederasiýasynyň Çagyryş ligasynda ilkinji gezek çykyş etmäge hukuk berdi.
2018-nji ýylda döredilen «Paro» futbol topary Butanyň futbol taryhynda öňdäki orunlary eýeleýän toparlaryň biri hökmünde tanalýar. Bu topar 2019-njy, 2021-nji, 2022-nji, 2023-nji we 2024-nji ýyllarda ýurduň çempiony boldy. Şeýle hem, «Paro» futbol topary 2020-nji, 2022-nji hem-de 2023–2024-nji ýyllaryň möwsümlerinde Aziýa Futbol Konfederasiýasynyň ikinji derejeli topar ýaryşy hasaplanýan AFK-nyň Kubogy ugrundaky ýaryşa gatnaşyp, öňki tapgyrlarda çykyş etdi. Emma topar bu ýaryşda öňe geçip bilmedi.
2024-nji ýylyň awgust aýynda «Paro» futbol topary dünýäniň sport jemgyýetçiliginiň üns merkezine düşdi. Bu topar meşhur ýapon futbolçysy Keýsuke Honda bilen bir oýun üçin şertnama baglaşyp, AFK-nyň Çagyryş ligasyndaky utulan-çykdy tapgyrynda Nepalyň «Church Boys United» toparyna garşy duşuşyga gatnaşdy.
Şu möwsümde «Paro» topary ikinji ýyl yzly-yzyna AFK-nyň Çagyryş ligasynyň toparçalaýyn tapgyryna gatnaşmaga hukuk gazandy. Bu üstünlik, toparyň öň tapgyrda Owganystanyň «Abu Muslim» toparyny 1:0 hasaby bilen ýeňmegi netijesinde gazanyldy.
Gyrgyzystanyň Kant şäherinden bolan «Abdyş-Ata» futbol topary 2000-nji ýylda esaslandyryldy. 2003-nji ýyldan başlap, yzygiderli ýagdaýda ýurduň ýokary ligasynda çykyş edýär. Bu topar Gyrgyzystanyň Kubogyny bäş gezek – 2007, 2009, 2011, 2015 we 2022-nji ýyllarda gazandy. Şeýle hem, milli çempionatyň üç gezek ýeňijisi – 2022, 2023 we 2024-nji ýyllarda. 2023-nji ýylda «Abdyş-Ata» futbol topary AFK-nyň Kubogy ugrundaky ýaryşa ilkinji gezek gatnaşyp, üstünlikli çykyş etdi. Bu topar Gyrgyzystandan ýaryşa gatnaşyp, toparçalaýyn tapgyrdan üstünlikli geçmegi hem-de ýarym finala çykmagy başaran ilkinji futbol topary boldy.
2024–2025-nji ýyllaryň möwsüminde Gyrgyzystanyň «Abdyş-Ata» futbol topary AFK-nyň guramagynda ilkinji gezek geçirilen Çagyryş ligasynda çykyş etdi. Emma topar toparçalaýyn tapgyrdan geçmegi başarmady. 2024-nji ýylyň dekabr aýynda toparyň baş tälimçisi Islom Ahmedow wezipesinden çekildi. 2025-nji ýylda topara Çernogoriýaly hünärmen Wladimir Wuýowiç ýolbaşçylyk etmäge çagyryldy. Ýöne ol möwsüm başlamazdan öň topary terk etdi. Onuň ýerine Serbiýaly tälimçi Iwan Kurtuşiç geldi. Emma 2025-nji ýylyň aprel aýynda Kurtuşiç «Abdyş-Ata» bilen şertnamasyny ýatyrdy we Sloweniýanyň «Mura» toparyna geçdi. Onuň ýerine baş tälimçi wezipesine Mirlan Eşenow bellenildi. Mirlan Eşenowyň ýolbaşçylygynda topar 5 duşuşyk geçirdi we olaryň hemmesini uly hasap bilen ýeňdi. Şeýle-de bolsa, iýun aýynda M.Eşenow hem wezipesinden çekildi we ilki bilen «Alga», soňra bolsa «Bars» toparyna geçdi. «Abdyş-Ata» futbol toparynyň täze baş tälimçisi hökmünde Hurşit Lutfullaýew bellenildi.
«Altyn Asyr» futbol topary öz garşydaşlary bilen bilelikde «Günbatar» zolagynyň «A» toparçasyny emele getirdi. Bu toparlaryň duşuşyklary merkezleşdirilen görnüşinde Butanda geçiriler.
Beýleki toparlarynyň düzümi şu aşakdaky ýaly:
«Günbatar» zolagy
«B» toparçada: «Al-Sib» (Oman), «Al-Ansar» (Liwan), «Kuwait SK» (Kuwait, toparyň eýesi), «Bashundhara Kings» (Bangladeş).
«C» toparçada: «Regar-TadAZ» (Täjigistan), «Safa SK» (Liwan), «Al-Arabi SK» (Kuwait), «Muras United» (Gyrgyzystan, toparyň eýesi).
«Gündogar» zolagy
«D» toparçada: «Manila Digger» (Filippinler), «Preah Khan Reach Svay Rieng» (Kamboja, toparyň eýesi), «SP Falcons» (Mongoliýa), «Ezra» (Laos).
«E» toparçada: «Dewa United» (Indoneziýa, toparyň eýesi), «Shan United» (Mýanma), «Tainan City» (Taýwan), «Phnom Penh Crown» (Kamboja).
Bu toparçalardaky duşuşyklar 25-nji oktýabrdan başlap 1-nji noýabra çenli dowam eder. Duşuşyklar merkezleşdirilen görnüşinde geçirilip, her bir topar diňe bir gezek garşydaşlary bilen duşuşar.
Toparçalaýyn tapgyryň jemleri boýunça çärýek finala jemi sekiz topar çykýar: Günbatar zolagy boýunça üç toparyň ýeňijisi hem-de ikinji orunlary eýelänleriň arasynda iň gowy netijäni görkezen bir topar; Gündogar zolagy boýunça bolsa her topardan iň gowy netijäni görkezen iki topar.
Utulan-çykdy tapgyryndaky duşuşyklar dürli ýurtlarda geçiriler. Çärýek final duşuşyklary 2026-njy ýylyň mart aýynda, ýarym final duşuşyklary aprel aýynda geçiriler. Ýaryşyň jemleýji tapgyry — final duşuşygy — 2026-njy ýylyň 9-njy maýyna meýilleşdirilýär.
turkmenistan.gov.tm
