2023-nji ýylyň 30-njy martynda Germaniýa Federatiw Respublikasynyň Konrad Adenauer adyndaky Gaznasynyň Özbegistan Respublikasynyň Daşkent şäherinde ýerleşýän Merkezi Aziýa boýunça sebitleýin ygtyýarly wekili Roni Haýneniň Türkmenistana saparynyň Maksatnamasynyň çäklerinde ýurdumyzyň Jemgyýetçilik guramalarynyň merkezinde iş duşuşygy geçirildi. Germaniýa Federatiw Respublikasynyň Konrad Adenauer adyndaky Gaznasynyň alyp barýan işi – Germaniýa Federatiw Respublikasynyň tejribesini döwlet dolandyryşy, ekologiki syýasaty, durmuş üpjünçiligine ugrukdyrylan ykdysadyýeti, ýaşlar syýasaty, bilim, köpçülikleýin habar beriş ulgamlarynda, şol sanda Germaniýanyň we Merkezi Aziýanyň ekspertleriniň arasynda tejribe alyşmak boýunça maglumat-dialoglaryny gurnamak maksady bilen Türkmenistana iş saparyny amala aşyrdy.
Duşuşygyň dowamynda daşary ýurtly myhmanyna Türkmenistanyň Magtymguly adyndaky Ýaşlar guramasynyň gurluşy we onuň alyp barýan işi, şeýle hem bu babatda döwletimizde ýaşlar syýasatynyň durmuşa geçirilişi boýunça alnyp barylýan işler barada tanyşdyryldy.
Soňra myhman hem öz gezeginde Germaniýa Federatiw Respublikasynda ýaşlar babatynda alnyp barylýan işler, ýaşlar guramalarynyň gurluşy we geljekde hyzmatdaşlygy ýola goýup boljak ugurlary barada Türkmenistanyň Magtymguly adyndaky Ýaşlar guramasynyň wekilleri bilen gürründeş boldy. Netijeli geçen bu duşuşyga Gaznanyň sebitleýin wekili Roni Haýnen we onuň kömekçileri Aşraf Alikulow, Abdullajon Mamajonow, Türkmenistanyň tebigaty goramak jemgyýetiniň “Tebigy Kuwwat” jemgyýetçilik guramasynyň direktory Berkeli Ataýew hem-de Türkmenistanyň Magtymguly adyndaky Ýaşlar guramasynyň Merkezi Geňeşiniň Halkara hyzmatdaşlygy bölüminiň müdiri Begenç Halnepesow, baş hünärmeni Merjen Muhammedowa we Sanly ulgam we maglumat howpsuzlygy bölüminiň müdiri Begmuhammet Meredow hem gatnaşdylar.
