Türkmenistan wekiliýetiniň Pakistana amala aşyran saparynyň çäginde Türkmenistanyň daşary işler ministri Raşid Meredow bilen Pakistan Yslam Respublikasynyň Federal energetika ministri Musadik Masud Maligiň arasynda duşuşyk geçirildi.
Duşuşygyň dowamynda taraplar energetika pudagyndaky hyzmatdaşlyk meselelerini, hususan-da, Türkmenistan-Owganystan-Pakistan-Hindistan (TOPH) gaz geçirijisini we Türkmenistan-Owganystan-Pakistan (TOP) elektrik geçiriji liniýasyny gurmak taslamalaryny ara alyp maslahatlaşdylar.
Bu nukdaýnazardan, taraplar sebitleýin gatnaşyklary pugtalandyrmakda, ykdysady ösüşi ösdürmekde we gatnaşyjy ýurtlaryň energiýa zerurlyklaryny kanagatlandyrmakda iri taslamalaryň strategiki ähmiýetine ünsi çekdiler.
TOP elektrik geçiriji liniýasynyň we TOPH gaz geçirijisiniň Pakistanyň senagat elektrik zerurlyklaryny kanagatlandyrmakda möhüm rol oýnajakdygy bellenildi.
Taslamalary iş ýüzünde durmuşa geçirmek üçin zerur bolan ikitaraplaýyn resminamalary taýýarlamak boýunça işiň tamamlanmagynyň ähmiýetine ünsi çekdi. Şeýle hem, Türkmenistan bilen Pakistanyň arasynda energetika pudagynda bilelikdäki hereketleri üçin ýol kartasyny düzmek teklip edildi.
Taraplar bilelikdäki taslamalary durmuşa geçirmek üçin yzygiderli gatnaşyklary pugtalandyrmak babatda ylalaşdylar.
atavatan-turkmenistan
17.10.2024 ý.
