Türkmenistanyň Magtymguly adyndaky Ýaşlar guramasynyň Ahal welaýat Geňeşiniň guramagynda Änew şäherindäki medeniýet öýünde «Pähim-paýhas ummany Magtymguly Pyragy» ýyly mynasybetli wagyz-nesihat duşuşygy geçirildi. Welaýat, etrap Ýaşlar guramalarynyň işgärleriniň we işjeň agzalarynyň gatnaşmagynda geçen duşuşykda beýik akyldar şahyrymyz Magtymguly Pyragynyň doglan gününiň 300 ýyllygynyň giňden bellenýän ýylynda Garaşsyz Watanymyzyň jemgyýetçilik-syýasy durmuşynda bolup geçýän şanly wakalar, milli ykdysadyýetiň, halk hojalygynyň dürli ugurlarynda gazanylýan üstünlikler, ýetilýän sepgitler dogrusynda çykyşlar diňlendi.
Duşuşykda mukaddes Garaşsyzlygymyzyň 33 ýyllyk baýramynyň hormatyna paýtagtymyzda geçen Türkmenistanyň Halk Maslahatynyň nobatdaky mejlisinden gelip çykýan wezipeler, onda Gahryman Arkadagymyzyň we Arkadagly Gahryman Serdarymyzyň eden çuň manyly çykyşlarynyň taryhy ähmiýeti, şeýle-de Aşgabatda Magtymguly Pyragynyň doglan gününiň 300 ýyllygy mynasybetli «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly halkara forumyň üstünlikli geçirilendigi hakda aýratyn durlup geçilmegi hemmelerde uly gyzyklanma döretdi.
Turuwbaşdan täsirli geçen duşuşyga gatnaşanlar Garaşsyz, baky Bitarap Watanymyzy, bagtyýar halkymyzy bedew batly ösüşleriň nurana ýoly bilen eşretli günlere alyp barýan hormatly Prezidentimiziň we Gahryman Arkadagymyzyň adyna alkyş sözlerini aýtdylar.
Güljemal ATDAÝEWA,
TMÝG-niň Ahal welaýat Geňeşiniň işgäri.
