Berkarar Watanymyzda her ýylda geçirilýän, döwrümiziň ajaýyp däpleriniň birine öwrülen «Merdana nesil» atly şadyýan bäsleşik mekdep okuwçylarynyň arasynda uly meşhurlyga eýedir. Munuň şeýledigine «Pähim-paýhas ummany Magtymguly Pyragy» ýylynda Türkmenistanyň Magtymguly adyndaky Ýaşlar guramasynyň Merkezi Geňeşi hem-de Türkmenistanyň Bilim ministrligi tarapyndan yglan edilen şadyýan bäsleşigiň Ahal welaýatynyň Babadaýhan etrap tapgyry hem subut etdi. Watanymyzyň hemişelik Bitaraplygynyň şanly 29 ýyllygy mynasybetli geçirilýän «Merdana nesil — 2024» atly şadyýan bäsleşiginiň nobatdaky tapgyry etrabyň 19-njy orta mekdebiniň mejlisler zalynda geçirilip, oňa etrabymyzyň çägindäki orta mekdepleriň 23-sinden zehinli okuwçy oglanlar gatnaşdy. Toý öwüşginli sahnany merdana nesilleriň şadyýan çykyşlary bezedi. Olaryň bäsleşigiň şertleri esasyndaky çykyşlaryna eminler topary mynasyp baha berip, ýeňijileri kesgitledi.
Eminleriň çykaran netijesine laýyklykda, Babadaýhan etrabynyň 20-nji orta mekdebiniň okuwçysy Ahmet Annaýew I orna, 11-nji orta mekdebiniň okuwçysy Emirhan Tapirow II orna mynasyp bolup, bäsleşigiň welaýat tapgyryna gatnaşmaga hukuk gazandylar. Bäsleşige gatnaşan zehinli çagalara Türkmenistanyň Magtymguly adyndaky Ýaşlar guramasynyň Babadaýhan etrap Geňeşiniň sowgatlary gowşuryldy.
Şöhrat AKMÄMMEDOW,
TMÝG-niň Ahal welaýatynyň
Babadaýhan etrap Geňeşiniň
Guramaçylyk bölüminiň esasy hünärmeni
