Kitap okamak diňe bir gyzykly iş däl, eýsem şahsyýeti ösdürmek üçin güýçli guraldyr. Häzirki wagtda sanly tehnologiýalaryň giňden ýaýran döwründe kitaplar bilimiň, ylhamyň we duýgularyň möhüm çeşmesi bolup galýar. Geliň, yzygiderli kitap okamagyň esasy peýdalaryna seredeliň.
1. Akyl we dünýägaraýşy ösdürmek. Kitaplar dürli ugurlar boýunça köp sanly maglumatlary öz içine alýar. Çeper, ylmy ýa-da okuw kitaplaryny okamak bilen, biz täze maglumatlary öwrenýäris, dürli medeniýetler we dünýägaraýyşlar bilen tanyş bolýarys, maglumatlary seljermegi we deňeşdirmegi öwrenýäris.
2. Ýadyň we ünsüň gowulaşmagy. Kitap okanyňda adam wakalary, gahrymanlaryň häsiýetlerini we jikme-jiklikleri ýatda saklamaly bolýar. Bu bolsa, beýnini türgenleşdirýär, ýat we üns jemlemegi gowulandyrýar. Okamak üns jemlemäge mätäç bolany üçin gündelik durmuşda hem bu endik peýdaly bolup biler.
3. Söz baýlygyňy artdyrmak we ýazuw başarnygyňy kämilleşdirmek. Näçe köp kitap okasaň, şonça-da köp täze söz we aňlatmalar bilen duş gelýärsiň. Bu bolsa, söz baýlygynyň artmagyna, dilden we ýazuwdan peýdalanmagyň gowulaşmagyna ýardam edýär. Mundan başga-da, yzygiderli kitap okamak dil düzgünlerini we stilini awtomatiki öwrenmäge kömek edýär.
4. Tankydy pikirlenmäni ösdürmek. Kitaplar adamy pikirlenmäge, gahrymanlaryň hereketlerini seljermäge, wakalary dürli nukdaýnazardan bahalandyrmaga iterýär. Ylmy ýa-da publisistik kitaplary okamak adamda pikirlerini esaslandyryp, beýan etmek, maglumatlary tankydy taýdan kabul etmek we aldawa düşmezlik başarnygyny ösdürýär.
5. Gaýgynyň azalmagy we emosional ýagdaýyň gowulaşmagy. Kitap okamak gündelik aladalardan gaçmaga we başga bir dünýä girmegi başarmaga kömek edýär. Gowy kitaplar ynjyklygy azaldyp, keýpiňi gowulandyryp, hatda depressiýa garşy göreşmäge kömek edip biler. Esasanam, uklamazdan ozal kitap okamak dynç almaga we ukynyň hilini gowulandyrmaga ýardam edýär.
6. Hyýaly we döredijiligi ösdürmek. Kitap okanyňda, biz gürrüň berilýän sahnalary, gahrymanlary we wakalary göz öňüne getirýäris. Bu bolsa, hyýal güýjüni herekete getirýär, döredijilik pikirlenmäni ösdürýär. Bu aýratyn-da, döredijilik ugrundan işleýän adamlar üçin möhüm häsiýetdir.
7. Empatiýanyň (duýgudaşlygyň) ýokarlanmagy. Kitaplaryň gahrymanlarynyň pikirlerine we duýgularyna çümüp, biz beýleki adamlaryň duýgularyna düşünmegi öwrenýäris. Gözlegleriň görkezişi ýaly, çeper edebiýat okamak empatiýany ösdürmäge, adamlara has duýgur we ünsli bolmaga kömek edýär.
8. Şahsy ösüş we öz-özüňi kämilleşdirmek. Motiwasion we psihologiýa kitaplary adama öz üstünde işlemäge, maksat goýup, olara ýetmäge ýardam edýär. Üstünlik gazanan adamlaryň terjimehallary täze maksatlara ruhlandyryp, öz ýoluňy tapmaga kömek edip biler.
Kitap okamak akyl, emosional ýagdaý we şahsy ösüş üçin güýçli guraldyr. Ol daş-töwerege has gowy düşünmäge, akyl derejesini artdyrmaga we şahsyýeti ösdürmäge kömek edýär. Kitap okamagy endik ediň – onuň durmuşyňyza edýän oňyn täsirini tiz duýarsyňyz!
Berdimyrat KAKAÝEW,
Türkmenistanyň Magtymguly adyndaky
Ýaşlar guramasynyň Daşoguz welaýatynyň
Akdepe etrap Geňeşiniň başlygy.
