Mary şäherindäki “Bagt köşgi” toý-dabaralar merkezinde TMÝG-niň Mary şäher Geňeşiniň we Mary welaýat Baş bilim müdirliginiň bilelikde guramagynda TMÝG-niň Merkezi geňeşiniň hem-de Türkmenistanyň Bilim ministrliginiň Milli bahar baýramy mynasybetli ýurdumyzyň umumybilim berýän mekdepleriniň 2 – 4-nji synplarynda okaýan okuwçy gyzlarynyň arasynda yglan eden «Iň eýjejik gyzjagaz – 2025» atly şadyýan bäsleşiginiň Mary şäher tapgyry geçirildi. Oňa şäherdäki umumybilim berýän orta mekdeplerde okaýan zehinli gyzjagazlar gatnaşdy.
Bäsleşik diýseň gyzykly hem çekeleşikli geçdi. Eýjejik gyzjagazlar ýurdumyzyň ösüşlerini, eziz Watanymyzy, bagtyýar çagalygy, dost-doganlygy, parahatçylygy we sagdyn durmuş ýörelgesini wasp edýän aýdymlary ýerine ýetirdiler, milli egin-eşiklerini geýip, ony şahyrana sözler bilen wasp etdiler we ýaş aýratynlygyna görä, ene-mamalarymyzdan nesilden-nesle geçip gelýän milli el işlerini ýerine ýetirip görkezdiler. Emin agzalarynyň adalatly baha bermeginde şäherdäki 22-nji orta mekdebiň 2-nji synp okuwçysy Ýasmina Allahwerdiýewa I, şäherdäki daşary ýurt dillerine ýöriteleşdirilen 11-nji orta mekdebiň 3-nji synp okuwçysy Maral Durdyýewa II, şäherdäki 16-njy ýöriteleşdirilen orta mekdebiň 4-nji synp okuwçysy Mährimelhem Ataýewa hem-de 2-nji orta mekdebiň 4-nji synp okuwçysy Aýläle Baýramgeldiýewa III orunlara mynasyp boldular.
Bäsleşigiň ahyrynda şäher tapgyrynda ýeňiji bolan we gatnaşan eýjejik gyzjagazlara TMÝG-niň Mary şäher Geňeşi tarapyndan Hormat hatlary we ýadygärlik sowgatlary gowşuryldy. Bäsleşikde 1-nji we 2-nji orunlary eýelän gyzjagazlar bäsleşigiň welaýat tapgyryna gatnaşmaga hukuk gazandylar.
Annagözel SARYÝEWA,
Türkmenistanyň Magtymguly adyndaky
Ýaşlar guramasynyň Mary welaýatynyň Mary şäher
Geňeşiniň Guramaçylyk bölüminiň müdiri.
