Türkmen topragynda togsan dolup, ýere ýyly girmegi bilen, tebigat gaýtadan janlanyp, gyş ornuny bahara berýär. Al-elwan güllere, lälezarlyga beslenen baharyň nurana günleri bagtly seneleri we wakalary bagyş edip, duýgy dünýämize tükeniksiz ylham berýär.
Her pasylyň öz gözelligi bar bolsa-da, bahar paslynyň kalbyňy heýjana salýan, gözelligine bendi edýän, görünmeýän, bilinmeýän jadysy bar. Dag-dereler ýaşyl begres geýende, durnalar gykuwlaşyp gelende, lemmer-lemmer gara bulutlar süýşüp, gök gübürdäp ýyldyrym çakanda, kükräp- kükräp bahar çabgasy ýaganda, ynsan kalby hem joşup, üýtgeşik duýgular döreýär. Baharyň nurana baýramlarynyň biri bolan Nowruz baýramynda owadanlyk, täzeleniş, tebigy özgeriş we Zemin görküne jemlenýär. Täze günüň — Täze ýylyň başlanmagy, gije bilen gündiziň deňleşmegi, ýaýlanyň ýaşyl mahmala beslenmegi tebigatyň täzelenişini we sazlaşygyny dabaralandyrýar.
Akyldar şahyrymyz Magtymguly Pyragynyň «Gelse Nowruz äleme, reň kylar jahan peýda» diýip taryp eden Nowruz baýramy bu günki günde asyrlaryň, nesilleriň kalbyndan geçip, diňe bir tebigatyň däl, ynsanlaryň we milletleriň arasyndaky sazlaşykly gatnaşygy dabaralandyrýar. Nowruz baýramynda däneli-kösükli ösümlikleriň ýedi görnüşinden — bugdaýdan, arpadan, şalydan, mäşden, noýbadan, süleden, jöwenden tagamlar taýýarlanyp, toý saçagy bezelipdir. Döwlen bugdaýdan, arpadan, ýarmadyr şalydan dürli tagamlary, jöwenden nowruz köjesi taýýarlanypdyr. Bugdaýyň, arpanyň unundan unaş edip, oňa noýba atylypdyr. Pederlerimiz bugdaý dänesiniň gaplarda çykyşyndan, boý alyşyndan çen tutup, bu ýylda hasylyň, rysgalyň nähili boljakdygyny kesgitläpdirler. Bu maýsadan semeni bişirmek hem Nowruzyň özboluşly däbi bolup galypdyr. Semenini, adatça köplük bolup taýýarlap, ony goňşy-golama, dogan-garyndaşlara paýlapdyrlar. Semeniden dadyp, ony bişirenlere, il-güne ýagşy dileg etmek gowy däpleriň biri bolupdyr. Zemine rysgal-bereket eçilip gelen bahar her birimiziň kalbymyzy päk niýetlere, ýagşy arzuwlara baglaýar. Adamlaryň ýüreklerini söýgüniň we bagtyň şuglasy bilen nurlandyryp, özüniň täze açylan güli, göwünleri heýjana getirýän ajaýyp täze görki bilen ata Watana, ene topraga bolan söýgüsini has belende göterýär.
Begli MÄMMEDOW,
Türkmenistanyň Magtymguly adyndaky
Ýaşlar guramasynyň Ahal welaýatynyň
Kaka etrap Geňeşiniň baş hünärmeni.
