Türkmenistanda Ýaşlar baýragyna hödürlenýänlerden resminamalaryň kabul edişligi başlandy. Bu baýragy almaga dürli ulgamlarda – edebiýatda, sungatda, medeniýetde, ylymda we tehnikada, lukmançylykda, sportda, oba hojalygynda, jemgyýetçilik işlerinde uly ösüşleri, döredijilik we zähmet işjeňligini görkezen ýurduň 16 ýaşdan 35 ýaşa çenli ýaş raýatlary dalaşgär hödürlenilip bilner diýip, «Türkmenistan: Altyn asyr» habar berýär.
Dalaşgärlerden resminamalar Türkmenistanyň Magtymguly adyndaky Ýaşlar guramasynyň şäher we welaýat geňeşlerinde 15-nji sentýabra çenli kabul ediler.
Resminamalarda dalaşgäriň soňky üç ýylda gazanan üstünlikleri barada maglumatlar bolmalydyr.
Gatnaşmak isleýänler aşakdaky resminamalary tabşyrmalydyr:
- 3x4 ölçegdäki 6 sany reňkli fotosurat;
- şahsy maglumatlary (maglumatnama we awtobiografiýa) kagyz hem-de elektron görnüşde (familiýasy, ady, atasynyň ady, doglan güni, aýy we ýyly wezipesi, iş we öý salgylary, şeýle hem telefon belgisi aýratyn görkezilmelidir);
- dalaşgäriň pasportynyň we zähmet depderçesiniň (eger işleýän bolsa) tassyklanan nusgalary;
- dalaşgäriň jemgyýetiň öňünde eden işlerini tassyklaýan resminamalar, hususan-da: Hormat hatlarynyň, diplomlaryň we beýleki baýraklaryň nusgalary, çykyşlarynyň we işleriniň fotosuratlary, CD we DVD ýazgylary, metbugatda çap edilen döredijilik işleriniň nusgalary;
- dalaşgäri baýraga hödürleýän edara, gurama ýa-da kärhana tarapyndan berlen häsiýetnama, şeýle hem Ýaşlar guramasynyň etrap, şäher ýa-da welaýat geňeşiniň teswirnamasyndan göçürmäniň gol we möhür bilen tassyklanan nusgasy.
Bu baýraga ozal eýe bolan şahslar baýragy almak üçin dalaşgärlik edip bilmeýärler.
turkmenportal
