AŞGABATDA TÄZE OKUW ÝYLYNA BAGYŞLANAN SERGI AÇYLDY

Täze okuw ýylynyň öňüsyrasynda Türkmenistanyň Döwlet şekillendiriş sungaty muzeýinde ýurdumyzyň suratkeşleriniň eserlerinden ybarat sergi gurnaldy. Muzeýiň hazynasynda bu temasy bilen bagly eserleriň birnäçesi saklanýar. Olaryň arasynda her ýyl Bilimler we talyp ýaşlar güni mynasybetli geçirilýän sergilerde hökman görkezilýän nusgawy suratlar hem bar. Şol suratlaryň hatarynda rus suratkeşi Pýotr Tutinasowyň «Ertir mekdebe» atly eseri bar.

Tomaşaçylaryň öňünde geljekki waka bilen ruhy göterilen gyzjagaz mekdep eşigini ütükläp dur. Okuw kitaplary bilen doldurylan torbasy bolsa eýýam taýýar. Gyzjagazyň begençli uçganaklaýan gözleri synpdaşlaryny göresi gelendigini, ertirem olar bilen duşjakdygyna begenýändigini görkezýär. Wagtyň geçmegi bilen mekdep eşikleri üýtgeýär, ýöne täze okuw ýylynyň başlanmagyna mahsus baýramçylyk duýgusy hemişe öz ornunda galýar.

Ýewgeniýa Adamowanyň «1-nji sentýabr» atly eserinde bolsa täze okuw ýylynyň ilkinji güni eýýam başlanypdyr. Suratda ejesi gyzyny birinji synpa ugradyp taýýarlamak bilen meşgullanýar. Bu ýatdan çykmajak pursata gyzjagazyň oglan we gyz jigisi, şeýle hem suratyň yzky hatarynda şekillendirilen goňşy hem gatnaşýarlar.

«Mugallym» temasy suratkeşler Muzafar Daneşwar bilen Ýakup Annanurowyň eserlerinde giňden açylyp görkezilýär. Olaryň suratlarynda çagalary bilim dünýäsine alyp barýan medeni ýaş mugallymlar şekillendirilipdir. Mugallymlar diňe bir ylmyň esaslaryny öwretmek bilen çäklenmän, eýsem ýaş neslini Watana wepaly raýatlar hökmünde terbiýeleýärler. Şeýle hünärmenleriň biri heýkeltaraş Babasary Annamyradowyň «Biziň oba mugallymymyz» atly heýkeli birnäçe ýyllaryň dowamynda tomaşaçylaryň kalbyny özüne çekýär. Heýkeltaraş uzak ýyllaryň dowamynda öz mugallymynyň keşbini ýüreginde saklap, oňa bolan hoşallygyny beýan etmek üçin ýaşuly adamyň heýkelini ýasady.

Aýhan Hajyýewiň «Ilkinji mugallym» atly meşhur suratynda sowatsyzlyga garşy alnyp barlan göreşiň uzak geçmişine syýahat edýäris. Ilkinji mugallym yssy çölünden döz gelip, uzakdaky oba mekdep esbaplaryny gowşurýardy. Ýyllar geçýär, onýyllyklar çalyşýarlar, emma ylmy-bilime berlen höwesjeň mugallymyň gahrymançylygy häzirki günlerde hem haýran galdyrýar.

Tomaşaçylar Baýram Hojammaýewiň «Synag» atly suratynyň öňünde uzak wagtlap saklanýarlar. Nakgaşa talyplaryň synagdan öňki tolgunma ýagdaýyny çuňňur duýgy bilen beýan etmek başardypdyr. Şeýle dartgynly pursatlara garamazdan, talyplyk döwri durmuşyň iň ajaýyp döwrüdir.

Sergide suratkeş Suwly Ýaranowyň «Parfiýa ýaşlary» atly suraty hem bar. Ýaş oglanlar we gyzlar ýerden ýokaryda süzüp barýarlar, elleri bilen bulutlara degýärler. Bu işi häzirki zaman türkmen ýaşlarynyň keşbini beýan edýär – olar gadymy taryhyň baý mirasyna eýe bolan türkmen halkyň häzirki neslidir.

turkmenistan.gov.tm